Rusiya Dövlət Duması 2022-ci ilin fevralından sonra ölkədəki biznes fəaliyyətini dayandıran və ya bazarı tərk edən xarici investorların şirkətlərdəki paylarını və səhmlərini geri alma imkanlarını məhdudlaşdıran qanun qəbul edib.
Zefer.media xəbər verir ki, bu barədə “İnterfaks” məlumat yayıb.
Məlumata görə, yeni qanun xarici investorların Rusiya bazarına qayıdışını çətinləşdirir. Belə ki, onların şirkətlərdəki paylarını geri almaq hüququ müəyyən hallarda məhkəmə qərarı ilə məhdudlaşdırıla və ya tamamilə rədd edilə bilər.
Qanuna əsasən, məhkəmə prosesi xarici investor geri alma hüququndan istifadə etmək üçün müraciət etməsə belə başlana bilər.
Yeni qaydalar yalnız Rusiyaya münasibətdə “dost olmayan ölkələr” siyahısına daxil edilən dövlətlərlə əlaqəli investorlara, onların nəzarətində olan xarici hüquqi şəxslərə və həmin investorların nəzarət etdiyi Rusiya şirkətlərinə aid ediləcək.
Xatırladaq ki, Rusiyanın Ukraynaya qarşı hərbi əməliyyatlara başlamasından sonra McDonald’s, The Coca-Cola Export Corporation, Nike, Adidas və Inditex qrupuna daxil olan Zara, Pull&Bear, Massimo Dutti və Bershka da daxil olmaqla çoxsaylı Qərb şirkətləri Rusiya bazarındakı fəaliyyətlərini dayandırıb və ya ölkəni tamamilə tərk ediblər.
Aytən Yalçınqızı
