İran ABŞ-nin Yaxın Şərqdəki münaqişənin başa çatdırılması adı altında irəli sürdüyü şərtlərlə razılaşmayacaq.
Zefer.media xarici mətbuata istinadən xəbər verir ki, bunu İran Xarici İşlər Nazirliyinin rəsmi nümayəndəsi İsmayıl Bəqai bildirib.
“İran ABŞ-nin müharibənin dayandırılması ilə bağlı irəli sürdüyü şərtləri qəbul etməyəcək. İslam Respublikası hakimiyyəti bütün səviyyələrdə, heç bir şübhə olmadan, dövlətin müdafiəsi məsələsində qətiyyətlidir”, – Tasnim agentliyi onun sözlərindən sitat gətirib.
Diplomatın sözlərinə görə, silahlı münaqişəni başlayan tərəf “öz əməllərinə görə məsuliyyət daşımalıdır”.
ABŞ və İsrail İrana qarşı müharibəyə fevralın 28-də başlayıb. İyun ayında Vaşinqton və Tehran bütün cəbhələrdə, o cümlədən Livanda hərbi əməliyyatların dərhal dayandırılmasını nəzərdə tutan anlaşma memorandumu imzalayıb.
Lakin iyulun 8-nə keçən gecə ABŞ əldə olunmuş razılaşmaların Hörmüz boğazı ilə bağlı şərtlərinin İran tərəfindən pozulduğunu iddia edərək İrana qarşı genişmiqyaslı zərbələri yenidən bərpa edib.
Hörmüz boğazı vasitəsilə dünya üzrə neft ticarətinin təxminən 25 faizi və mayeləşdirilmiş təbii qaz ticarətinin təxminən 20 faizi həyata keçirilir.
Pərvin Hacıyeva
