Bakı Dövlət Universiteti (BDU), İslam Əməkdaşlıq Təşkilatı (İƏT) Gənclər Forumunun Avrasiya Regional Mərkəzi, “BDU könüllüləri” təşkilatı və “Əmanət” Şəhid və Qazi Övladlarının Fərdi İnkişafına Dəstək Layihəsinin təşkilatçılığı ilə BDU-nun Quba Tədris-Təcrübə və İstirahət Mərkəzində “Şəhərsalma və Memarlıq İli”nə həsr olunmuş tələbələr və şəhid-qazi övladları üçün “Bir yay, min xatirə” adlı Yay düşərgəsi çərçivəsində daha beş təlim və seminar keçirilib.
Zefer.media xəbər verir ki, Azərbaycan Süni İntellekt İnstitutunun direktoru Emil Abdullayevin “Süni intellektin gücü: Generativ AI alətləri ilə yeni imkanlar” və “Ağıllı şəhərlər, ağıllı gələcək: Şəhərsalma və urbanizasiyada süni intellekt” mövzularında təlimlərində generativ süni intellekt alətləri, onların müxtəlif sahələrdə tətbiqi, eləcə də süni intellektin şəhərsalma və urbanizasiya prosesləri, ağıllı nəqliyyat sistemləri, enerji səmərəliliyi və müasir şəhər problemlərinin həllində yaratdığı imkanlar müzakirə olunub.
“BDU könüllüləri” təşkilatının layihələrin idarə edilməsi və təşkilatlarla iş üzrə meneceri Mədinə Xəlilovanın təqdimatında “Art-terapiya” təlimi keçirilib. Təlim çərçivəsində iştirakçılar rənglərin köməyi ilə daxili duyğularını, xəyal dünyalarını və xarici aləmə baxışlarını vərəq üzərində əks etdirib, daha sonra çəkdikləri əsərləri təqdim edərək rəng və fiqurların onlar üçün ifadə etdiyi mənaları bölüşüblər.
Dövlət Məşğulluq Agentliyinin aparıcı mütəxəssisi Mübariz İmanov isə düşərgə iştirakçılarına “Şəhər mühitində gənclər üçün imkanlar və karyera inkişafı” mövzusunda seminar keçib. Seminarda gənclər üçün mövcud imkanlar, əmək bazarının müasir tələbləri, karyera planlaması və peşəkar inkişaf yolları müzakirə olunub, iştirakçılara əmək bazarına hazırlıq, bacarıqların inkişaf etdirilməsi və məşğulluq imkanlarından səmərəli istifadə ilə bağlı praktiki tövsiyələr verilib.
Düşərgənin yekun sessiyasında BMT-nin Məskunlaşma Proqramının (UN-Habitat) təbliğat və layihələr üzrə baş məsləhətçisi Məleykə Tağızadə tərəfindən gənclərin gələcəyin şəhərləri ilə bağlı gözləntiləri və şəhər həyatında iştirakçılığı mövzusunda sessiya keçirilib. Sessiyada gənclərin şəhərlərin planlaşdırılması və inkişafında iştirakı, düzgün şəhər quruluşu, inklüzivlik və hər kəs üçün yaşana bilən şəhərlərin formalaşdırılması məsələləri müzakirə olunub. Həmçinin WUF13-ün əhəmiyyəti və nəticələri barədə iştirakçılara məlumat verilib.
