Bolqarıstan Milli Assambleyası ölkə ərazisində ekipajları ilə birlikdə ABŞ Hərbi Hava Qüvvələrinə məxsus 8-ə qədər hərbi yanacaqdaşıyan təyyarənin, həmçinin şəxsi silahları, döyüş sursatı və aerodrom texnikası ilə birlikdə 250-yə qədər ABŞ hərbçisinin yerləşdirilməsinə razılıq verib.
Zefer.media xarici mətbuata istinadən xəbər verir ki, qəbul olunan qərara əsasən, ABŞ qüvvələri 24 iyul – 1 oktyabr 2026-cı il tarixləri arasında Yaxın Şərqdə həyata keçirilən əməliyyatlara dəstək məqsədilə Bezmer aviabazasında yerləşdiriləcək.
Müvafiq təklif Bolqarıstan Nazirlər Şurası tərəfindən parlamentə təqdim edilib.
Qətnamə layihəsinin lehinə 136 deputat səs verib, 13 deputat əleyhinə çıxıb, daha 2 deputat isə bitərəf qalıb.
Bundan əlavə, parlament baş nazirə ABŞ qüvvələri və hərbi texnikasının yerləşdirilməsinin təmin olunması üçün zəruri təşkilati tədbirlərin görülməsini tapşırıb.
Bolqarıstan parlamentinin Müdafiə Komitəsinin hesabatına əsasən, bu qərarın icrası ölkənin Müdafiə Nazirliyinin 2026-cı il büdcəsindən əlavə maliyyə vəsaitinin ayrılmasını tələb etməyəcək.
