ABŞ və İsrailin İrana hücumları səbəbindən Yaxın Şərq son əsrin ən qarışıq günlərini yaşayır.
Zefer.media xəbər verir ki, bunu Türkiyə prezidenti Rəcəb Tayyib Ərdoğan deyib.
“Müharibə çağırışlarına qulaq asmayacağıq. Qalib 86 milyon insan, sülh və qardaşlıq olacaq”, – Türkiyə lideri bildirib.
Ərdoğan qeyd edib ki, İsrailin təhriki ilə İrana qarşı başlanan müharibə bölgəmizi qan və barıt qoxusu ilə bürüməyə davam edir:
“Günahsız uşaqlar məktəblərində dərs oxuyarkən raketlərlə hədəfə alınır. Bölgəmiz son əsrin ən ağrılı günlərini yaşayır. Nifrətlə kor edilmiş soyqırım şəbəkəsi dini mübahisələrin arxasında gizlənərək coğrafiyamızı fəlakətə sürükləyir. Hamı əmin olsun ki, nə qardaşlarımız və qonşularımız arasında ayrı-seçkilik edirik, nə də qardaşlarımızın əziyyət çəkdiyi vaxt sakit dayanırıq. Türkiyə və türk milləti olaraq dost və qardaş hesab etdiyimiz xalqları yaxşı günlərdə, pis günlərdə tərk etməyəcəyik. Netanyahu hökuməti təkcə qonşumuz İranı hədəf almır, həm də Livanı addım-addım işğal etmək planlarını həyata keçirir. Açıq şəkildə bildirmək istəyirəm ki, harada olursa olsunlar, amansızcasına öldürülənlər bizim qardaşlarımızdır. 27 gündür ki, bütün prinsipləri, dəyərləri və normaları nəzərə almayan bu təcavüzkarların nəzərində şiə, yoxsa sünni, türk, kürd, ərəb və ya fars olmağımızın fərqi varmı?”
Zərintac Mayisqızı
