İranın xarici işlər naziri Abbas Əraqçı ABŞ prezidenti Donald Trampın dondurulmuş İran aktivlərinin gəmilərə dəyən ziyanın ödənilməsi üçün istifadə olunacağı barədə açıqlamasını sərt tənqid edib.
Zefer.media xəbər verir ki, bununla bağlı, Əraqçı “X” hesabında yazıb:
“Başqa bir dövlətin aktivlərinin gələcəkdə irəli sürülə biləcək, həmin aktivlərlə əlaqəsi olmayan iddiaların ödənilməsi üçün müsadirə edilməsi son dərəcə təhlükəli presedent yaradır.
Belə vəsaitlərin bölüşdürülməsini alqışlayan və ya onlardan faydalananlar bunu unutmamalıdırlar: hökumətlər aktivlərin müsadirəsini adi praktikaya çevirərsə, artıq heç kimin əmlakı güvəndə olmayacaq.
Bunun doğuracağı xaos isə nə xoş, nə də dinc olacaq”.
Xatırladaq ki, Donald Tramp növbəti xəbərdarlığa qədər gəmilərə, yüklərə və onlarla bağlı obyektlərə dəyən bütün zərərlərin dondurulmuş İran vəsaitləri hesabına qarşılanacağını bildirmişdi.
Zərintac Mayisqızı
