İran prezidenti Məsud Pezeşkian paytaxt Tehranda bir qrup təhlükəsizlik rəsmisi ilə görüşüb.
Zefer.media xəbər verir ki, o görüş zamanı açıqlamasında deyib:
“Hazırkı vəziyyətdə variantlar var: İran xalqının şərəfini və milli maraqlarını nəzərə alaraq danışıqlara başlamaq, nə müharibə, nə də sülh mövqeyində qalmaq, ya da münaqişə yolunda davam etmək”.
O, ABŞ və İsrailə qarşı əldə edilən “qələbənin” xalqın maraqlarını qoruyan diplomatik addımlarla yekunlaşdırılmalı olduğunu bildirib və əlavə edib ki, bu, rasional yanaşmadır.
İran prezidenti vurğulayıb ki, İran “düşmən”ə etibar etmir, əksinə milli maraqların və ölkənin şərəfinin qorunmasına əsaslanan danışıqlara açıqdır və İran xalqına fayda verəcək bir razılaşmaya sadiq qalacaqlar.
Pezeşkian həmçinin müharibə zamanı zədələnmiş təhlükəsizlik binaları ilə bağlı da açıqlamalar verib.
O, hökumətin müharibədə zədələnmiş təhlükəsizlik mərkəzlərinin təmiri və yeni avadanlıqlarla təmin edilməsi üçün əlindən gələni edəcəyini söyləyərək, təhlükəsizlik qüvvələrinin yenidən qurulmasına ehtiyac olduğunu və ekspert qruplarının həmin məsələ ilə əlaqədar araşdırmalar aparmalı olduğunu əlavə edib.
İran prezidenti o cümlədən təhlükəsizlik qüvvələrini müharibə dövründə qazandıqları uğurlara görə təbrik edib.
Zərintac Mayisqızı
