Azərbaycan Prezidenti İlham Əliyev iyulun 30-da Qırğız Respublikasına dövlət səfərinə gəlib. Prezident İlham Əliyevi və birinci xanım Mehriban Əliyevanı Qırğızıstan Prezidenti Sadır Japarov və birinci xanım Aygül Japarova qarşılayıblar.
Səfərin nəticələrinin təkcə ikitərəfli münasibətlərə deyil, bütövlükdə Türk dünyasında əməkdaşlığa da təsir göstərəcəyi gözlənilir.
Politoloq Elçin Xalidbəyli Zefer.media-ya açıqlamasında bildirib ki, səfər Orta Asiya ilə əməkdaşlığın genişlənməsi baxımından xüsusi əhəmiyyət daşıyır:
“Azərbaycan Prezidenti İlham Əliyevin Qırğızıstana səfəri iki ölkə arasında ikitərəfli münasibətlərin inkişafı baxımından böyük əhəmiyyət daşıyır. Həm də bu, yalnız iki ölkə deyil, ümumiyyətlə, Orta Asiya üçün xüsusi əhəmiyyət daşıyan bir səfərdir. Çünki bu səfər çərçivəsində Azərbaycanın Orta Asiya ölkələri ilə qarşılıqlı münasibətlərinin yeni mərhələyə keçirilməsi ilə bağlı proseslər də start götürmüş kimi görünür.
Qırğızıstan Türk Dövlətləri Təşkilatının önəmli təmsilçilərindən biridir, Azərbaycan isə Türk Dövlətləri Təşkilatının avanqard ölkəsidir. Bu baxımdan Azərbaycan-Qırğızıstan münasibətləri həm də Türk Dövlətləri Təşkilatının qlobal məkanda daha güclü mövqedən çıxış etməsi baxımından böyük önəm daşıyır”.
Ekspert qeyd edib ki, türk dövlətləri qlobal siyasətdə daha fəal mövqe nümayiş etdirməyə başlayıblar:
“Bu səfər türk dövlətləri arasında inteqrasiya prosesinin intensivləşməsi və dünyada türk siyasi iradəsinin ön plana çıxması baxımından da böyük əhəmiyyət daşıyır. İndiki mərhələdə türk dövlətlərinin bir çox sahələr üzrə geniş əməkdaşlıq mərhələsinə keçməsi, təbii ki, qlobal məkan üçün də xüsusi təsiri ola biləcək bir prosesdir. Çünki artıq türk coğrafiyasına aid olan dövlətlər əvvəlki kimi yalnız dünya düzəninin inkişaf istiqamətlərini nəzərə alan ölkələr statusundan tədricən çıxmağa başlayıblar. Yəni indi türk dövlətləri, o cümlədən də Azərbaycan qlobal məkanda siyasi iradə nümayiş etdirməyə başlayıblar. Bu da onu göstərir ki, yeni dünya düzənində Türk Dövlətləri Təşkilatının, eləcə də bu qurumun avanqard dövləti kimi Azərbaycanın həlledici səviyyədə təsiri inkarolunmaz reallığa çevrilməkdədir”.
Lalə Qurbanlı
