Dünya Atletika Birliyinin prezidenti Sebastian Ko atletikanın gələcəyi ilə bağlı olduqca nikbin olduğunu bildirib və idman növünün Olimpiya proqramında birinci mövqeyini qoruyub saxlamalı olduğunu deyib.
Zefer.media bu barədə Xinhua – ya istinadən xəbər verir.
“Dünyada həqiqətən qlobal miqyasda yayılan cəmi iki idman növü var: biri futbol, digəri isə atletikadır. Biz Olimpiya idman növləri arasında birinci mövqeyimizi qoruyub saxlamalıyıq”, — Ko Sürixdə keçiriləcək “Diamond League” mərhələsi ərəfəsində bildirib.
“İdmanın gələcəyi ilə bağlı çox nikbinəm. Heç vaxt onun gələcəyi barədə bu qədər nikbin olmamışam. Mənim xələfim kim olursa-olsun, məndən daha güclü vəziyyətdə olan bir idmanı təhvil alacaq. Tam əminəm ki, bu idman növü inkişafını davam etdirəcək. Bilirəm ki, atletika Olimpiya idman növləri arasında birinci mövqeyini qoruyacaq”, — gələn ay 70 yaşı tamam olacaq prezident qeyd edib.
Britaniyalı mütəxəssis 2027-ci ildə Dünya Atletika Birliyinin prezidenti vəzifəsindən ayrılacaq. O, 2019-cu ildə “Dünya Atletikası” adlandırılan Beynəlxalq Atletika Federasiyaları Assosiasiyasının prezidenti vəzifəsinə 2015-ci il avqustun 19-da Pekində keçirilən seçkilərdə seçilib. Onun xələfi 2027-ci il Dünya Atletika Çempionatından dərhal əvvəl Pekində keçiriləcək Dünya Atletika Birliyinin Seçki Konqresində müəyyənləşəcək.
“Qarşıdakı bir il ərzində məqsədim gələcək illərdə daha güclü idmanın formalaşmasına və inkişafına kömək edəcəyinə inandığım dəyişiklikləri həyata keçirməyə davam etməkdir. Mən vəzifədən ayrıldığım zaman güclü rəhbərliyin olmasını və idmanın inkişafını davam etdirməsini istəyirəm. Təbii ki, hər zaman dəstək olmaq və bacardığım hər şəkildə kömək etmək üçün orada olacağam. Lakin bundan sonra bu çağırışların öhdəsindən gəlmək növbəsi başqa birinə çatacaq”, — prezident bildirib.
2026-cı il “Diamond League” mövsümü sentyabrın 11-dən 13-dək Budapeştdə keçiriləcək ilk “Ultimate Championship” yarışından əvvəl başa çatmaq üzrədir. İki ildən bir keçiriləcək bu mövsümsonu yarışında dünya çempionları, Olimpiya çempionları, “Diamond League” qalibləri və il ərzində ən yüksək nəticələr göstərmiş atletlər titul və pul mükafatı uğrunda mübarizə aparacaqlar.
Yarışın ümumi mükafat fondu 10 milyon ABŞ dollarıdır. Hər bir növ üzrə qalib 150 min ABŞ dolları məbləğində mükafat əldə edəcək.
Pərvin Hacıyeva
