Standartlara cavab vermədiyi halda Ermənistan mallarının Rusiyaya idxalına məhdudiyyətlər qoyulub, qoyulur və qoyulacaq.
Bu fikirləri Ermənistanın Baş nazir Nikol Paşinyan İrəvandan Rusiyaya gül daşınmasına qoyulan məhdudiyyətləri şərh edərkən deyib.
Paşinyan bildirib ki, Aİİ məkanında məhsulların keyfiyyəti və mənşəyi ilə bağlı oxşar hallar əvvəllər də yaşanıb və bu məsələlər müxtəlif platformalarda müzakirə olunub.
“Dostluq dostluqdur, vəzifə də vəzifədir. Əgər münasibətlər dostcasınadırsa, bu o deməkdirmi ki, Aİİ standartlarına cavab verməyən mallar heç bir monitorinq olmadan ölkəyə buraxılmalıdır?” – deyə o ifadə edib.
Adıçəkilən məhdudiyyətlər nədən xəbər verir ?
Rusiyanın Ermənistan məhsullarına tətbiq etdiyi məhdudiyyətlərin mümkün nəticələrindən danışan politoloq Elçin Xalidbəyli Zefer.media-ya açıqlamasında vurğulayıb ki, Ermənistan iqtisadiyyatı böyük ölçüdə Rusiya bazarından asılıdır:
“Ermənistan iqtisadiyyatı üçün Rusiya bazarları hazırda, demək olar ki, həlledici xarakter daşıyır. Çünki Ermənistan iqtisadiyyatının istehsalı olan məhsulların mütləq hissəsi məhz Rusiya bazarlarına çıxarılır. Əgər həmin bazarlar bağlanarsa, o zaman Ermənistan iqtisadiyyatı tamamilə çökə bilər. Artıq sözügedən proses başlamış kimi görünür. Çünki Kreml Ermənistanın kənd təsərrüfatı məhsullarının Rusiya bazarlarına çıxarılmasına qadağa qoymağa başlayıb. Bunu da məhz seçki ərəfəsində edir. Çünki kənd təsərrüfatı məhsulları tez xarab olan məhsullar olduğuna görə, onların istehsalçıları ciddi zərərə məruz qalacaqlar və nəticədə bunun günahını Paşinyan hakimiyyətində gördüklərinə görə ona səs verməkdən imtina edə bilərlər”.
Ekspert Rusiyanın addımlarını siyasi təzyiq vasitəsi kimi qiymətləndirib:
“Təbii ki, Kremldə bütün bunları hesablayıblar. Ona görə də hazırda Paşinyan hakimiyyətinə təzyiq göstərmək üçün Ermənistana iqtisadi-ticari sanksiyalar tətbiq etməyə başlayıblar. Belə anlaşılır ki, seçki günü yaxınlaşdıqca Paşinyan hakimiyyətinə zərbə vurmaq üçün Ermənistana qarşı iqtisadi-ticari və yaxud da digər istiqamətlər üzrə Rusiyanın zərbələri, təzyiqləri daha da artmağa başlayacaq. Kremlin əsas məqsədi iki ölkə arasındakı iqtisadi-ticari əlaqələri də geopolitik alətə çevirərək Paşinyan hakimiyyətini zəiflətmək və seçkidə məğlubiyyətə məruz qoymaqdan ibarətdir.
Böyük ehtimalla, yaxın günlərdə biz Rusiyanın Ermənistanla bağlı planlarını daha açıq-aydın şəkildə görməyə başlayacağıq. Hətta ola bilər ki, seçki günü yaxınlaşdıqca, hətta seçkidən sonra belə Ermənistan əhalisini Paşinyan hakimiyyətinə qarşı qoymaq üçün Rusiya hətta ölkə daxilində, yəni Ermənistan daxilində vətəndaş qarşıdurmasına qədər ağır, radikal addımların atılmasına da cəhd göstərə bilər. Bu da onu göstərir ki, Ermənistan hazırda çox taleyüklü mərhələdən keçir və bu mərhələ Ermənistanın birbaşa gələcək taleyini həll edəcək”.
Lalə Qurbanlı
