Rusiyanın dövlətə məxsus RİA Novosti agentliyi Rusiyanın Litva ilə mümkün hərbi münaqişəsinə həsr olunmuş “Rusiyanı daha bir xüsusi hərbi əməliyyat gözləyir. Bu, çox qısa olacaq” başlıqlı məqalə yayımlayıb.
Zefer.media “Minval”a istinadən xəbər verir ki, material Litva parlamentinin ölkədə nüvə silahının yerləşdirilməsinə qoyulan qadağanın ləğvi ilə bağlı qərarından sonra dərc olunub.
Müəllif Aleksandr Nosoviç Baltikyanı regionda mümkün münaqişənin coğrafi səbəblərdən Ukraynadakı müharibədən daha qısa sürəcəyini yazıb və Rusiyanın nüvə döyüş başlıqlı raketlərdən istifadə edə biləcəyini ehtimal edib.
“Rusiya quru qoşunlarını belə yerləşdirməkdən imtina edə bilər. Yalnız müvafiq döyüş başlıqlı raketlər”, – məqalədə qeyd olunub.
Lakin material dərc edildikdən bir saat keçməmiş naməlum səbəbdən RİA Novosti-nin saytından silinib.
Aytən Yalçınqızı
