Azərbaycanın ÜDM artım dinamikası son 25 ildə Çinlə müqayisə edilə biləcək səviyyədə olub.
Zefer.media xəbər verir ki, bunu II Azərbaycan Beynəlxalq İnvestisiya Forumunda “The European House – Ambrosetti” şirkətinin baş direktoru və idarəedici tərəfdaşı Valerio De Molli bildirib.
Onun sözlərinə görə, Azərbaycanın ÜDM artımı son 25 ildə dinamika və artım baxımından Çinin göstəriciləri ilə eyni səviyyədə olub.
Təqdim olunan araşdırmaya əsasən, Azərbaycan ümumi cəlbedicilik üzrə dünyada 60-cı, dinamika üzrə 15-ci, dayanıqlılıq üzrə 73-cü, gələcəyə yönümlülük üzrə isə 62-ci yerdə qərarlaşıb. Ölkə 2019-cu ildə dinamika üzrə 140-cı mövqedə olub.
De Molli Azərbaycanın əsas üstünlükləri sırasında sabitlik, dinamik iqtisadi mühit, açıqlıq, innovasiya və iqtisadiyyatın şaxələndirilməsi siyasətini qeyd edib.
Ekspert həmçinin Azərbaycanın enerji balansı üzrə dünyada 4-cü, elmi nəşrlərin artım tempi üzrə 1-ci, dövlət borcunun ÜDM-ə nisbəti üzrə 8-ci, birbaşa xarici investisiya axınının dinamikası üzrə 6-cı yerdə olduğunu bildirib. Onun sözlərinə görə, 2000-ci ildən etibarən hökumətin səmərəliliyinin yaxşılaşması üzrə Azərbaycan 2-ci yerdədir.
De Molli manatın sabitliyini və ev təsərrüfatlarının 99 faizinin optik internetlə əhatə olunmasını da vurğulayıb.
Aytən Yalçınqızı
