İran Prezidenti Məsud Pezeşkian Pakistanın Baş naziri Şahbaz Şəriflə telefonla danışıb.
Zefer.media xəbər verir ki, bu barədə “IRNA” məlumat yayıb.
Pezeşkian ABŞ-nin İrana qarşı dəniz və ərazi məhdudiyyətlərinin son zamanlar artırılmasının etimadın qurulması və diplomatiya üçün ciddi maneə olduğunu bildirib və əlavə edib:
“ABŞ-yə açıq məsləhətimiz budur: problemlərin həlli üçün uyğun bir zəmin yaradılacaqsa, əvvəlcə blokada da daxil olmaqla əməliyyat maneələri aradan qaldırılmalıdır. Çünki İran təzyiq, təhdid və blokada altında danışıqlara girməyəcək”.
İran prezidenti qeyd edib ki, danışıqlar prosesi yalnız qarşılıqlı hörmət və etimadın qurulması yolu ilə irəliləyə bilər və təzyiq və təhdid siyasəti davam edərkən dialoq nəticə verə bilməz.
Pezeşkian müharibəni başlayan tərəfin İran olmadığını və regional qeyri-sabitlik istəmədiyini bildirib və əlavə edib ki, danışıqlar yalnız bərabər şərtlərlə və beynəlxalq hüquq çərçivəsində aparıla bilər.
Digər tərəfdən, Pakistanın Baş naziri Şərif görüş zamanı ölkəsinin İranla qardaşlıq və həmrəylik münasibətlərinə dəyər verdiyini və mövcud gərginliyin azaldılması üçün diplomatik səyləri fəal şəkildə dəstəklədiyini ifadə edib.
Pakistanın bölgədəki gərginliyi azaltmaq üçün Türkiyə, Qətər və Səudiyyə Ərəbistanı ilə əlaqələrinə toxunan Şərif, bu təşəbbüslərin atəşkəsin qorunması və davamlı sülhə nail olmaq üçün çox vacib olduğunu söyləyib.
Pakistanın İranın suverenliyini və təhlükəsizliyini hədəf alan heç bir addımı qəbul etməyəcəyini vurğulayan Şərif, İranın təzyiq və müharibə ilə ram edilə bilməyəcəyini, İran xalqının güclü müqavimət göstərdiyini və rejim dəyişikliyi gözləntilərinin real olmadığını vurğulayıb.
Hazırkı dövrün son dərəcə həssas olduğunu və səhv addımların bölgəni daha böyük bir böhrana sürükləyə biləcəyini xəbərdar edən Pakistan Baş naziri, bütün tərəflərin təmkinli davranmalı olduğunu deyib.
Zərintac Mayisqızı
