Artıq yaz fəslindəyik, havalar isinməyə doğru gedir. Görəsən turizm sahəsində vəziyyət nə yerdədir? Şübhəsiz, baş verən müharibələr, xüsusilə artıq 1 aya yaxındır Yaxın Şərqdəki münaqişələrin də mənfi təsirləri kifayət qədərdir.
Turizm eksperti Rəhman Quliyev Zefer.media-ya açıqlamasında deyib ki, Yaxın Şərqdə baş verən hərbi ixtişaşlar təkcə Azərbaycanda yox, bütün dünyada turizmə çox ciddi zərər vurur:
“Dünya Səyahət və Turizm Şurasının açıqlamasına görə, gün ərzində bütün beynəlxalq turizmə 600 milyon dollardan çox zərər dəyir. Bu zərərdən Azərbaycan da təsirlənir. Nəzərə alsaq ki, müharibədən öncəki dövrdə, bir neçə ay bundan qabağa qədər Körfəz ölkələrindən çox turist kütləvi şəkildə Azərbaycana gəlirdi. İndi artıq həmin hava limanları hərbi ixtişaşlar fonunda bağlıdır. Ona görə də heç bir turist nə Azərbaycandan sözügedən istiqamətlərə, nə də adıçəkilən yerlərdən Körfəz ölkələrinə və Azərbaycana heç bir turist gələ bilmir. Habelə ümumi olaraq digər ölkələrdən də gələn və gedən turistlərin sayında azlıq müşahidə edirik. Bu da yenə də yaxın Şərqdə baş verən olaylardan irəli gəlir. Şərq ölkələrindəki müharibə dönəmində hava limanları ilk olaraq hədəf oldu, bu da turistlərdə müəyyən qədər qorxu hissi yaradır. Həmçinin savaşlar Novruz bayramı tətili günləri ilə üst-üstə düşdü. Ona görə də o tarixlərə olan tur paketlər ləğv olundu”.
Rəhman Quliyev əlavə edib ki, qarşıdan gələn yay tətili günlərində güvənli ölkələrlə turist mübadiləsi aparmaq mümkündür:
“Qardaş Türkiyədə Antalya, Bodrum, Quş adası, Marmarisə, Gürcüstanda Tbilisi, Batum istiqamətinə tələbatlar var. Eyni zamanda orta Asiya ölkələrin – Özbəkistan, Qazaxıstan və Avropa ölkələrin, həmçinin Misir güvənli ölkələr sırasındadır. Yay tətili günlərində Azərbaycan vətəndaşları xüsusilə Türkiyə istiqamətinə daha çox fəal olacaqlar”.
Zərintac Mayisqızı
