Yay aylarında dəniz kənarı hamımız üçün ən cəlbedici istirahət məkanıdır. Dalğaların səsi, qum və günəş insanı gündəlik qayğılardan uzaqlaşdırır. Həmçinin sağlamlıq baxımından da dənizin suyu, havası və qumu olduqca faydalıdır. Lakin bəzən unuduruq ki, heyranlıqla izlədiyimiz o mavi sonsuzluq, bircə anlıq ehtiyatsızlıq ucbatından böyük bir faciənin ssenarisinə çevrilə bilər. Statistika göstərir ki, hər il çimərliklərdə yaşanan bədbəxt hadisələrin kökündə təbii fəlakətlərdən daha çox, insan amili və arxayınlıq dayanır.
Bəs dəniz istirahətini həm xoş, həm də tam təhlükəsiz etmək üçün nələrə diqqət etməliyik?
Məsələylə bağlı Zefer.media – ya açıqlama verən təhlükəsizlik eksperti Orxan Musayev çimərliklərdə təhlükəsizlik qaydalarına əməl olunmamasının acı nəticələrindən danışıb və həyati vacib məqamlara toxunub:
“Çimərliklərdə baş verən faciələrin böyük əksəriyyəti insan amili ilə bağlıdır. Yəni insanların yol verə biləcəyi və qarşısı alına bilən səhvlər onları təhlükəli vəziyyətlə üz-üzə qoyur. Dəniz istirahəti insanların ən çox üstünlük verdiyi istirahət növlərindən və məkanlarından biridir. Lakin bu gözəllik qəfil şəkildə insan həyatı üçün ciddi təhlükə yarada bilər. Bəzən insanlar dənizdə istirahət edərkən onun təhlükəli tərəflərini nəzərə almırlar.
Təəssüf ki, spirtli içki qəbul etdikdən sonra suya girmək, uşaqları nəzarətsiz buraxmaq və qadağan olunmuş ərazilərdə çimmək hələ də adi davranış kimi qəbul edilir”.
Mütəxəssisin sözlərinə görə, vətəndaşlar yalnız Fövqəladə Hallar Nazirliyinin xilasedicilərinin növbə çəkdiyi rəsmi çimərliklərə üz tutmalıdırlar:
“İnsanlar yalnız nəzarət olunan və rəsmi fəaliyyət göstərən çimərliklərdən istifadə etməlidirlər. Çünki həmin ərazilərdə Fövqəladə Hallar Nazirliyinin xilasedici heyəti xidmət göstərir və hər hansı fövqəladə hadisə baş verdikdə operativ müdaxilə etmək imkanı mövcuddur. Nəzarətsiz çimərliklərdə isə xilasedici xidmət olmadığından fövqəladə vəziyyət zamanı insan həyatını xilas etmək əksər hallarda mümkün olmur.
Nəzarət olunan çimərliklərdə suyun dərinlik səviyyəsi əvvəlcədən müəyyən edilir, insanların xəsarət almasına səbəb ola biləcək daşlar, qaya parçaları və digər təhlükəli maneələr təmizlənir.
Dənizə daxil olmazdan əvvəl hava şəraiti, küləyin sürəti və dalğaların hündürlüyü mütləq nəzərə alınmalıdır. Hətta peşəkar üzgüçülər belə əlverişsiz meteoroloji şəraitin təsiri nəticəsində çətin vəziyyətə düşə bilirlər”.
Ekspert qayda pozuntularına qarşı həm inzibati cərimələrin tətbiqini, həm də cəmiyyətdə ciddi bir ictimai qınağın yaradılmasını zəruri hesab etdiyini diqqətə çatdırıb:
“Maarifləndirmə və təbliğat xarakterli tədbirlər daha da genişləndirilməlidir. İnsanlar yalnız “dalğa var, üzmək olmaz” kimi xəbərdarlıqlarla kifayətlənməməli, eyni zamanda dalğaların insan orqanizminə təsiri barədə də məlumatlı olmalıdırlar. Axına düşdükdə nə baş verdiyini, boğulma zamanı orqanizmdə hansı proseslərin getdiyini bilmələri vacibdir. Çimərliklərdə müəyyən edilmiş qaydalar pozulduqda, məsələn, qadağan olunmuş ərazilərdə çimdikdə və ya spirtli içki qəbul etdikdən sonra suya daxil olduqda, bu hallarla bağlı həm ictimai qınaq formalaşdırılmalı, həm də inzibati qaydada cərimə tədbirləri tətbiq edilməlidir. Bu, insanların belə təhlükəli davranışlardan çəkinməsinə kömək edə bilər”.
Orxan Musayev, sonda hər kəsi saniyələr içində baş verən gizli təhlükəyə qarşı oyaq olmağa səsləyib:
“Boğulma hadisələrinin əksəriyyəti saniyələr ərzində, səssiz və xəbərdarlıq olmadan baş verir. Yəni insanlar qışqırmır, sadəcə suyun altında görünməz olurlar. Hər il baş verən bu faciələrin təkrarlanmasının əsas səbəbi ehtiyatsızlıq və “mənə heç nə olmaz” düşüncəsidir. Məhz bu düşüncə tərzindən uzaqlaşmaq lazımdır”.
Pərvin Hacıyeva
