ABŞ və İsrailə məxsus döyüş təyyarələri Tehrandakı Şərif Texnologiya Universitetinin məlumat mərkəzini hədəf alıb, İranın süni intellekt infrastrukturunu dəstəkləyən obyekt vurulub və itki olmadığı bildirilib.
Zefer.media xəbər verir ki, hücum Şərif Texnologiya Universiteti nəzdində yerləşən məlumat mərkəzinə edilib.
Fars Xəbər Agentliyi hücumun bazar axşamı baş verdiyini və obyektin ölkənin süni intellekt platforması ilə yanaşı minlərlə rəqəmsal xidmət üçün infrastruktur təmin etdiyini ifadə edib.
İranın ən nüfuzlu universitetlərindən biri hesab edilən bu qurumun rektoru Məsud Tehrani hücumdan sonra yaydığı video müraciətdə universitetin “elm və mədəniyyətin yayılmasına həsr olunmuş bir qurum” olduğunu vurğulayaraq baş verənləri qınayıb.
Xatırladaq ki, bölgədə gərginlik ABŞ və İsrailin 28 fevralda İrana qarşı başladığı birgə əməliyyatlardan sonra sürətlə artıb. Bu hücumlarda Əli Xameneyinin də daxil olduğu 1340-dan çox insanın həyatını itirdiyi bildirilib.
Lalə Qurbanlı
