“OpenAI”, “Anthropic” və digər süni intellekt şirkətlərinin sürətli inkişafı yeni milyonçu və milyarderlər dalğasının yaranmasına səbəb olub.
Yeni texnologiya elitası qazandıqları sərvəti evlərə, şəxsi təyyarələrə, superavtomobillərə və yaxtalara xərcləyir.
Zefer.media “Financial Times”a istinadən xəbər verir ki, UBS-in məlumatına görə, dünyada milyarderlərin sayı bir il ərzində 13 faiz artaraq 3 302 nəfərə çatıb.
San-Fransiskoda fərdi evlərin median qiyməti isə bir il ərzində təxminən 25 faiz artaraq 2,1 milyon dollara yüksəlib.
Bununla yanaşı, yeni texnologiya elitasının dəbdəbəyə yanaşması ənənəvi varlılardan fərqlənir.
Gənc milyonçular nümayişkaranə dəbdəbədən daha çox sürət, məxfilik, fərdiləşdirmə və sağlam həyat tərzinə üstünlük verirlər.
Məlumata görə, onlar şəxsi təyyarələri mobil tətbiqlər və “WhatsApp” vasitəsilə bron etməyə, kriptovalyuta ilə ödəniş etməyə və təyyarələrdə şampan əvəzinə sağlam qidalar təqdim olunmasına üstünlük verirlər.
Yeni varlılar arasında “Lamborghini Urus”, “Ferrari” və “Porsche” kimi avtomobillər populyarlığını qoruyur. Yaxtalarda isə dəbdəbədən çox funksionallığa üstünlük verilir.
İdman avadanlığı, “Starlink” interneti və aktiv istirahət üçün müxtəlif imkanlarla təchiz edilmiş yaxtalara tələbat artır.
Yeni texnologiya zənginləri arasında süni intellekt bumundan böyük gəlirlər əldə edən “Nvidia” əməkdaşları və investorları da yer alır.
Aytən Ağazadə
