Rusiya-Ukrayna müharibəsinin yaratdığı gərginlik bu dəfə Yunanıstan sahillərinə qədər uzandı.
Yunanıstanın Lefkada adası sahillərində Ukraynaya məxsus olduğu bildirilən dəniz dronunun aşkarlanması Afinanın narahatlığına səbəb olub. Yunanıstan hakimiyyəti hadisə ilə bağlı Kiyevdən rəsmi izahat və gələcəkdə belə halların təkrarlanmayacağına dair təminat tələb edib.
Görəsən hadisənin arxasında həqiqətən kimlər dayanır?
Məsələyə münasibət bildirən AĞ Partiya sözçüsü, siyasi şərhçi Cavanşir Abbaslı Zefer.media-ya bildirib ki, Yunanıstanın belə bir izahat tələb etməsi tamamilə normaldır:
“Hər bir müstəqil dövlət belə hadisələr zamanı qarşı tərəfdən izahat tələb edir. Ona görə də Afinanın narahatlığı başadüşüləndir. Hazırda dünya elə bir mərhələdədir ki, istənilən hadisə ilə bağlı şübhələrin yaranması və müəyyən ehtimalların nəzərdən keçirilməsi təbii qarşılanır. Fikrimcə, Yunanıstanı narahat edən əsas məqamlardan biri də hadisənin arxasında təkcə Kiyevin deyil, başqa bir gücün dayanıb-dayanmaması ehtimalıdır. Afina da məhz bunu aydınlaşdırmaq üçün izahat tələb edir. Bu, beynəlxalq münasibətlər baxımından normal yanaşmadır. Yəqin ki, Yunanıstan məsələni sonadək araşdıracaq və müəyyən nəticəyə gələcək.Əgər Ukrayna tərəfinin həmin hadisədə iştirakı yoxdursa, təbii ki, Kiyev öz reaksiyasını verəcək, mövqeyini dəlil və sübutlarla qarşı tərəfə təqdim edəcək. Çünki bunu etməyə borcludur. Nəzərə almaq lazımdır ki, Rusiya-Ukrayna müharibəsinin ilk günlərindən Yunanıstan Ukraynaya dəstək nümayiş etdirən ölkələrdən biri olub və bu gün də rəsmi bəyanatlar səviyyəsində Kiyevi dəstəkləməyə davam edir”.
Qəmər Kazımzadə
