Rusiya Prezidenti Vladimir Putin müharibənin mümkün məğlubiyyətlə başa çatmasının onun hakimiyyəti və şəxsi təhlükəsizliyi üçün ciddi nəticələr doğura biləcəyindən ehtiyat edir.
Zefer.media xəbər verir ki, “The Economist” yazır ki, uzunmüddətli müharibə Kreml üçün getdikcə daha çox strateji dalana çevrilir. Nəşrin məlumatına görə, müharibənin Rusiyanın ən azı minimal məqsədinə – Donbas üzərində tam nəzarətin təmin edilməsinə – nail olunmadan başa çatması Putin üçün təhlükə yarada bilər.
Nəşrin mənbələrindən biri iddia edib ki, Putin bir müddət yaxın ətrafına “Onlar məni asacaqlar” deyib.
“The Economist”in məlumatına görə, belə vəziyyətdə Kreml Ukraynaya zərbələri gücləndirə, Ukraynanın müttəfiqlərinə qarşı hibrid əməliyyatları genişləndirə və yeni səfərbərlik tədbirləri həyata keçirə bilər. Bildirilir ki, cəbhəyə əlavə 300–400 min nəfərin göndərilməsi də nəzərdən keçirilir.
Nəşr Rusiyada müharibədən yaranan yorğunluğun artdığını da qeyd edir. “Levada Mərkəzi”nin məlumatına görə, ölkə əhalisinin 57 faizi Rusiyadakı vəziyyəti gərgin hesab edir. İtkilər, PUA hücumları, internet məhdudiyyətləri və gələcəklə bağlı qeyri-müəyyənlik əhali arasında narazılığı artırır.
“The Economist”in yazdığına görə, Rusiya elitasında da müharibədən narazılıq artır. Nəşrin həmsöhbətlərindən biri bildirib ki, müharibənin nəticəsindən asılı olmayaraq, onun artıq beş ilə yaxın davam etməsi özü-özlüyündə uğursuzluq kimi qiymətləndirilə bilər.
Bununla belə, nəşrin mənbələri Putinin geri çəkilmək niyyətində olmadığını bildirirlər. Onların fikrincə, Rusiya siyasi sistemi üçün zəiflik nümayiş etdirmək müharibəni davam etdirməkdən daha təhlükəli ola bilər.
Pərvin Hacıyeva
