Dövrümüzün trendinə çevrilən, ən çox istifadə olunan texnoloji kəşfi süni intellektdir. Ondan demək olar ki, bütün sahələrdə istifadə edilməyə başlayıb. Sürəti, operativliyi sayəsində bir çox işləri asanlaşdırır. Tibbdə də geniş yer alıb. Həkimlərin dayağına çevrilir, insanların suallarını dərhal cavablandırır.
Bütün bunlar beynimizdə bir sual yaradır: “Uzun illərini tibbə həsr edən həkim yoxsa süni zəka?”
Səhiyyə Nazirliyinin mütəxəssis-eksperti, terapevt Zakir Quliyev Zefer.media-ya açıqlamasında deyib ki, günümüz reallığında həmin suala bir mənalı cavab vermək çətindir:
“Lakin bir həqiqət var ki, əsas məsələ seçim deyil, düzgün əməkdaşlıqdır. Süni intellekt tibb aid məlumatları daha çevik analiz edir, riskləri müəyyənləşdirir. Diaqnostika prosesində həkimə əlavə imkanlar yaradır. Bu, səhiyyədə dəqiqliyin və operativliyin artmasına ciddi töhvədir. Ancaq tibbdə xəstəni dinləmək, onu anlamaq, vəziyyətinə uyğun düzgün yanaşma tətbiq etmək və s. məsuliyyətlər həkimin missiyasıdır. Süni zəka isə hesablayır və təhlil edir. Amma həkimlər bilik, təcrübə və insani mövqe ortaya qoyur. Ona görə də gələcəyin tibbi “həkim yoxsa süni intellekt?” qarşıdurması üzərində qurulmamalıdır. Süni zəka bir mütəxəssisi əvəz edən yox, onu gücləndirən vasitədir”.
Zərintac Mayisqızı
