“Təcili qan lazımdır”, “Xəstə birinə pul yardımı toplanılır”, “Avtomobil satılır, yaxşı vəziyyətdədir, beh qabaqcadan tələb edilir” kimi elanlar sosial şəbəkələrdə tez-tez qarşımıza çıxır. Bu cür elanlar səbəbindən dələduzların toruna düşən o qədər şəxslər var ki, etimadlarından sui-istifadə olunur. Nəticədə doğru olsa belə insanlarda inam azalıb.
İctimai-siyasi xadim, ilahiyyat üzrə fəlsəfə doktoru, deputat Ceyhun Məmmədov Zefer.media-ya açıqlamasında deyib ki, sözügedən məsələ çox ciddi problemə çevrilib:
“Artıq ehtiyacı olanlar belə müraciət etdikdə əksəriyyət onlara güvənmir, kömək etməkdən çəkinirlər. İnsanların etimadını qazanıb, sonra belə neqativ, günah addımlar atmaq yolverilməzdir. Ümumiyyətlə həmin elanları gördükdə maksimum diqqətli olmaq lazımdır, öyrənilməlidir ki, bu nə dərəcədə həqiqətə uyğundur, seçici davranılmalıdır. Vurğulayım ki, hüquq-mühafizə orqanları da qeyd edilən istiqamətdə həyata müxtəlif layihələr keçirirlər və mübarizə tədbirləri daha da artırılmalıdır. Öncə belə yalançı elanlar paylaşan şəxslər mənfi əməldən gərək çəkinsinlər. Lakin kimsə onların toruna düşürsə də aidiyyatı qurumları dərhal məlumatlandırsınlar”
İnformasiya və Kommunikasiya Texnologiyaları üzrə (İKT) mütəxəssis Fərhad Mirəliyev isə vurğulayıb ki, rəqəmsal mühitdə sözügedən məqamlardan, problemlərdən sığortalanmaq mümkün deyil:
“Əmin ola bilmərik ki, sosial media vasitəsilə edilən ianə gedib təyinat yerinə yüz faiz çatır. Demək olar ki, gündəlik xeyli sayda vətəndaş kibercinayətkarlığa məruz qalırlar. Öncə o elanları yaxşı araşdırmaq zəruridir: Sənədlər, qanuni olub-olmaması əsas nüanslardır. Məsələn, bəzilərinin maddi durumlarının zəifliyini silaha çevirərək kiberdələduzlar onları sosial şəbəkə üzərindən talayır, fırıldaqçılıq edirlər. Qısa zamanda varlanmaq həvəsi bir çox şəxsin gözünü boyayır və rahatlıqla tora düşürlər. Rəqəmsal mühitdə hər hansı elanla əlaqədar məlumat aldıqda gedib baxmaq, dərhal üzbəüz görüşmək, sənədləri araşdırmaq önəmlidir. Əks təqdirdə risk həmişə mövcuddur”.
Zərintac Mayisqızı
