Rusiyanın Yamalo-Nenets Muxtar Dairəsində 128 təbii yanğın davam edir.
Zefer.media URA.ru-ya istinadən xəbər verir ki, avqustun 26-da səhər saatlarına olan məlumata görə, yanğınların söndürülməsinə müxtəlif regionlardan 1356 mütəxəssis cəlb olunub. Ərazilərdə su boşaltma avadanlığı ilə təchiz edilmiş helikopterlərdən də istifadə edilir.
Əsas yanğın ocaqları Krasnoselkup, Purovsk və Nadım rayonlarında yerləşir.
“Avialesoxrana”nın məlumatına görə, bütün yanğınlar əlçatmaz və ucqar ərazilərdə baş verib. Yanğınların əsasən ildırım çaxması nəticəsində başladığı bildirilir.
Vəziyyəti bölgədə hökm sürən bloklayıcı antisiklon daha da çətinləşdirir. Məlumata görə, yağış cəbhələri bölgəyə çatmadan dağıldığı üçün yanğınların söndürülməsinə təbii yağıntılar kömək etmir.
Aytən Yalçınqızı
