Rusiya parlament seçkilərindən əvvəl Ermənistanın siyasi planlarını müzakirə etməyi mümkün hesab edir.
Zefer.media xəbər verir, bunu Kremlin sözçüsü Dmitri Peskov deyib.
“Biz inanırıq ki, həmkarlarımızla məsələləri aydınlaşdırmağa və (Ermənistanda qarşıdan gələn parlament seçkiləri kontekstində) onların planlarını həqiqətən müzakirə etməyə haqqımız var”, – deyə o bildirib.
Peskovun sözlərinə görə, Ermənistandakı daxili siyasi proseslərə maraq iki ölkə arasında sıx tarixi əlaqələrlə yanaşı, İrəvanın siyasi kursunun ikitərəfli münasibətlər üçün əhəmiyyəti ilə bağlıdır.
Bundan əlavə, Rusiya prezidentinin mətbuat katibi Ermənistan hakimiyyətinin Qarabağı Azərbaycanın bir hissəsi kimi tanımaq qərarının müstəqil şəkildə, Rusiyanın iştirakı olmadan qəbul edildiyini vurğulayıb. O, Moskvanın bu addımda heç bir iştirakının olmadığını və həmin məsələnin müzakirəsində Rusiyaya istinad edilməyəcəyini gözlədiyini bildirib.
Qeyd etmək yerinə düşər ki, Putin də dəfələrlə bu cür açıqlamalar verib. Hətta açıqlamalarının birində söyləyib ki, Rusiya uzun illər Qarabağda “referendum” keçirilməsi təklifini dəstəkləyib. Rusiya lideri bununla demək istəyib ki, Paşinyan Kremlin Qarabağla bağlı planlarını pozub.
Politoloq Elxan Şahinoğlu bununla əlaqədar vurğulayıb ki, Paşinyan Azərbaycanın ərazi bütövlüyünü tanımasaydı, Putin rusiyalı hərbçiləri Qarabağdan çıxarmayacaqdı: “Çünki belə anlaşılır. Halbuki, rəsmi Bakı sülhməramların 5 ildən çox bölgədə qalmasına razı deyildi”.
Zərintac Mayisqızı
