Qazaxıstanda kənd təsərrüfatında zərərvericilərlə mübarizəni gücləndirmək məqsədilə dron texnologiyalarının tətbiqi genişləndirilir.
Zefer.media Orda.kz-a istinadən xəbər verir ki, bu çərçivədə tarlalara təxminən 50 ədəd pilotsuz uçuş aparatı göndəriləcək.
Qazaxıstan Kənd Təsərrüfatı Nazirliyindən bildirilib ki, kənd təsərrüfatı dronları ənənəvi texnikanın çata bilmədiyi ərazilərdə — çöllərdə, dağlıq zonalarda və çay daşqınlarının baş verdiyi sahələrdə effektiv fəaliyyət göstərir.
Qurum qeyd edir ki, pilotsuz uçuş aparatlarının istifadəsi zərərvericilərin yayılmasını daha operativ şəkildə müəyyən etməyə, monitorinq prosesini sürətləndirməyə və tədqiq olunan ərazilərin əhatə dairəsini genişləndirməyə imkan yaradır.
Fitosanitar Təhlükəsizliyi üzrə Metodiki Mərkəzin məlumatına əsasən, son bir ildə dron parkı əhəmiyyətli dərəcədə genişlənib. Belə ki, 2025-ci ildə cəmi 7 dron mövcud idisə, ötən ilin dekabr ayında əlavə 50 dron alınıb. Hazırda ümumilikdə 57 dron istifadə olunur.
Mütəxəssislər hesab edirlər ki, bu yenilik mövsümə hazırlıq səviyyəsini artıracaq və potensial risklərə daha çevik reaksiya verməyə şərait yaradacaq.
Aytən Yalçınqızı
