ABŞ Mərkəzi Kəşfiyyat İdarəsinin (CIA) direktoru Con Retkliff bu həftə Rusiyaya elan edilməmiş səfəri zamanı Moskvanı NATO ölkələrinə, xüsusilə Rusiya ilə həmsərhəd Estoniya, Latviya və Litvaya qarşı hər hansı hücumun yolverilməz olduğu barədə xəbərdar edib.
Zefer.media xəbər verir ki, bu barədə Politico məlumatlı mənbələrə istinadən yazıb.
Nəşrin məlumatına görə, bu, Donald Trampın prezidentliyi dövründə CIA direktorunun Moskvaya məlum olan ilk səfəri olub. ABŞ prezidenti səfəri “rutin” adlandırıb və onun Ukraynadakı müharibənin başa çatdırılması istiqamətində səylərlə bağlı olduğunu bildirib.
Səfər Rusiya və Ukrayna arasında qarşılıqlı hücumların intensivləşdiyi, həmçinin Moskvanın NATO ölkələrinə qarşı yeni təhdidlərinin səsləndiyi bir vaxtda baş tutub.
ABŞ və Avropa ölkələrinin paytaxtlarında Rusiyanın NATO müttəfiqlərinə qarşı yeni hibrid hücumlara və ya məhdud hərbi əməliyyatlara əl ata biləcəyi ilə bağlı narahatlıqların artdığı bildirilir.
Aytən Yalçınqızı
