Bu gün qəhrəmanlıq salnaməsində xüsusi yeri olan, Azərbaycanın Milli Qəhrəmanı, general-mayor Polad Həşimovun şəhid olmasının altıncı ildönümüdür.
Polad İsrayıl oğlu Həşimov 2 yanvar 1975-ci ildə Qəbələ rayonunun Vəndam kəndində anadan olub. Sonradan ailəsi ilə birlikdə Sumqayıt şəhərinə köçüb. O, 1992-ci ildə Sumqayıt şəhər 34 nömrəli tam orta məktəbi bitirib və həmin il Heydər Əliyev adına Ali Hərbi Məktəbə daxil olub. 1995-ci ildə motoatıcı ixtisası üzrə məzun olan Polad Həşimov hərbi xidmətə başlayıb.
Zefer.media xəbər verir ki, Qarabağ uğrunda gedən döyüşlərdə şücaəti ilə seçilən gənc zabit kimi iştirak edən Polad Həşimov müxtəlif hərbi əməliyyatlarda şərəflə xidmət göstərib. Xidməti dövründə əsgərləri ilə birlikdə ön xəttdə olması və peşəkarlığı ilə seçilib.
O, 2016-cı ilin Aprel döyüşlərində də böyük əzmkarlıqla iştirak edib. Tərtər rayonunun Talış kəndi istiqamətində strateji yüksəkliklərin azad olunması əməliyyatlarında Ordu Korpusunun qərargah rəisi kimi xidmət göstərib. Hazırda həmin ərazidəki postlardan biri qəhrəmanın xatirəsinə “Polad postu” adlanır. Aprel döyüşlərində göstərdiyi xidmətlərə görə Prezidentin sərəncamı ilə II dərəcəli “Vətənə xidmətə görə” ordeni ilə təltif olunub.
2019-cu ildə Polad Həşimova general-mayor ali hərbi rütbəsi verilib və o, Ordu Korpuslarından birinin qərargah rəisi təyin edilib.
2020-ci il iyulun 14-də Ermənistan silahlı qüvvələrinin Tovuz rayonu istiqamətində törətdiyi təxribatın qarşısı alınarkən general-mayor Polad Həşimov şəhid olub. Onun şəhadəti ölkədə geniş ictimai rezonans doğurub və minlərlə insan son mənzilə yola salınma mərasimində iştirak edib.
Polad Həşimov ölümündən sonra Prezident İlham Əliyevin sərəncamı ilə “Azərbaycanın Milli Qəhrəmanı” adına layiq görülüb.
Lalə Qurbanlı
