Xəbər verdiyimiz kimi Rusiya prezidenti Vladimir Putin ilə Ermənistanın baş naziri Nikol Paşinyan arasında Kremldə görüş keçirilib. Görüşdə gərgin anlar yaşanıb, aralarındakı ziddiyətli münasibətləri açıq – aydın gördük.
Putin Paşinyana qəti şəkildə “Ya Avropa İttifaqını, ya da Avrasiya İqtisadi İttifaqını seçməlisiz, ikisi bir arada mümkün deyil” xəbərdarlığını etdi.
Politoloq Elxan Şahinoğlu Zefer.media-ya açıqlamasında deyib ki, Rusiya lideri vaxtilə eyni sözləri Ukraynanın keçmiş Prezidenti Viktor Yanukoviçə də söyləmişdi, bunun nə ilə nəticələndiyi bəllidir, iki ölkə arasında müharibə beşinci ilinə keçib.
“Yəni Putin sanki Paşinyana da demək istədi ki, yanlış qərar versəz, bunun Ukrayna kimi Ermənistan üçün də ağır nəticələri olacaq. Paşinyanın Putinə cavabı bu oldu ki, Ermənistan hələ o mərhələyə çatmayıb ki, Avropa İttifaqı ilə Avrasiya İqtisadi İttifaqı arasında seçim etsin. Ümumiyyətlə iki liderin mətbuat qarşısında dünənki görüşü qarşılıqlı ittihamlar şəklində keçdi. Bu nadir hallarda baş verən hadisədir. Hər iki lider fikirlərini diplomatik tərzdə ifadə etməyə çalışsalar da, Paşinyan Putinin hər təklifinə faktiki mənfi cavab verdi”, – politoloq əlavə edib.
Zərintac Mayisqızı
