“Bu gün dost və qardaş Azərbaycanda BMT-nin Ümumdünya Şəhərsalma Forumunun 13-cü Sessiyasında (WUF13) iştirak edirik. “İki dövlət, bir millət” şüarı ilə Azərbaycan və Türkiyə liderlərinin formalaşdırdığı qardaşlıq münasibətləri iki türk xalqının gələcəyi naminə daha da möhkəmlənir. Türkiyə-Azərbaycan dostluğunun daha da gücləndirilməsi istiqamətində biz də aidiyyəti şəxslərlə birlikdə fəaliyyət göstəririk.
Bildiyiniz kimi, COP29-a Azərbaycan sədrlik etdi və Azərbaycan dövlət strukturları bu tədbiri çox uğurlu şəkildə təşkil etdilər. Burada həm cənab Prezident İlham Əliyevin ortaya qoyduğu iradə, həm də COP29-un prezidenti Muxtar Babayev qardaşımızın fəaliyyəti, onun komandasının əməyi həqiqətən də çox uğurlu oldu .Biz də Türkiyə olaraq azərbaycanlı qardaşlarımızın və dostlarımızın bu təcrübəsindən istifadə edəcəyik. Bakıda qəbul edilmiş qərarları və Bakı-Belen Yol Xəritəsində müəyyən olunan hədəfləri COP31-də nəzərə alacağıq. Amma istəyirik ki, COP31 artıq fəaliyyət yönümlü olsun”.
Zefer.media xəbər verir ki, bu sözləri Türkiyənin Ətraf Mühit, Şəhərsalma və İqlim Dəyişikliyi naziri Murat Kurum “WUF13” çərçivəsində jurnalistlərə açıqlamasında deyib.
Şəhərsalma Forumunun 13-cü Sessiyası çərçivəsində Azərbaycan Energetika Nazirliyi ilə Türkiyənin Ətraf Mühit, Şəhərsalma və İqlim Dəyişikliyi Nazirliyi arasında “Binalarda enerji səmərəliliyi üzrə texniki əməkdaşlıq haqqında” Anlaşma Memorandumunun imzalandığını diqqətə çatdıran Murat Kurum Azərbaycan və Türkiyə prezidentlərinin ortaya qoyduğu güclü dostluq iradəsinin iki ölkənin daha sıx əməkdaşlığına imkan yaratdığını qeyd edib.
“Azərbaycanla münasibətlərimizi daha da gücləndirmək əzmindəyik. Məqsədimiz bölgəmizdə güclü iki dövlət olaraq əməkdaşlığımızı inkişaf etdirmək və dünyada sülhə töhfə verməkdir”, – deyə o söyləyib.
Pərvin Hacıyeva
