Ermənistan Rusiya ilə münasibətlərdə gərginlik yaratmaq niyyətində deyil.
Zefer.media xəbər verir ki, bu barədə xarici işlər naziri Ararat Mirzoyan İrəvanda Litva xarici işlər naziri Kestutis Budris ilə keçirdiyi mətbuat konfransında bildirib.
Jurnalistin Rusiyadan “siyasi ayrılma” ehtimalı ilə bağlı sualına cavab olaraq Mirzoyan qeyd edib ki, Ermənistan heç bir tərəfdaşı ilə münasibətlərini kəsməyi planlaşdırmır.
Nazir bildirib: “Prinsip etibarilə siyasət və diplomatiya belə “boşanmaları” tanımır. Moskva ilə İrəvan arasındakı münasibətlərə gərginlik qatmaq niyyətimiz yoxdur. Biz tərəfdaşıq, çoxsaylı əlaqələrimiz var və konstruktiv dialoq atmosferində qarşılıqlı faydalı əməkdaşlığı inkişaf etdirməyə sadiqik”.
Onun sözlərinə görə, ölkələr arasında problemlər var, amma bu cür məsələlər bütün beynəlxalq münasibətlərdə ortaya çıxır və müzakirələr yolu ilə həll edilməlidir.
Mirzoyan qeyd edib ki, bütün tərəflər bir-birinin müxtəlif məsələlərdə müstəqil qərar qəbul etmək hüququna hörmət etməlidirlər.
Avropa İttifaqı və Avrasiya İqtisadi İttifaqı arasında mümkün seçimdən danışan nazir vurğulayıb ki, Ermənistan Rusiyanın açıqlamaları olmadan belə, hər iki strukturun eyni vaxtda üzvü olmasının mümkün olmadığını anlayır.
Onun sözlərinə görə, İrəvan Aİ ilə yaxınlaşmasını davam etdirir və son qərar “vaxtı çatanda” veriləcək.
Xatırladaq ki, Baş nazir Nikol Paşinyan bir müddət əvvəl deyib ki, Aİ və AİB arasında seçim etmək üçün Ermənistan xalqı özü qərar verməlidir və hansı strategiyanın ölkə üçün daha perspektivli və faydalı olduğunu müəyyənləşdirməlidir.
Həmçinin mayın 9-da Rusiya Prezidenti Vladimir Putin mətbuat konfransında bildirib ki, İrəvan “ağıllı boşanma” ehtimalını nəzərə alaraq, Aİ və ya AİB-də iştirak məsələsinə mümkün qədər tez qərar verməlidir.
Zərintac Mayisqızı
