İstər mənzil, istərsə də torpaq bazarı ilə əlaqədar əksər vətəndaşlar bahalılıqdan şikayət edir. Paytaxt Bakının mərkəz yerlərində isə qiymətlər “od tutub yanır”.
Bəs görəsən hazırda daşınmaz əmlak bazarında vəziyyət nə yerdədir? Yenə bahalaşma baş verir mi?
Əmlak eksperti Ramil Qasımzadə Zefer.media–ya açıqlaması zamanı deyib ki, ümumiyyətlə, mənzil bazarı yeni tikili, o cümlədən təkrar mənzil bazarından ibarətdir və qiymətlərə gəlincə:
“Ötən ayla müqayisədə qiymətlər stabil olaraq qalıb, ilin əvvəli ilə müqayisədə isə təxminən 10 faiz artım müşahidə edilir. Bu daha çox 100 kvadratmetrə qədər olan yeni tikililərdə və təkrar mənzil bazarında, xüsusilə ipotekaya yararlı təkrar mənzil bazarındakı evlərə aiddir. Artımların səbəbi İpoteka və Kredit Zəmanət Fondu tərəfindən artıq vəsaitin açılması və ipotekaya dair müraciətlərin qəbuldur. Amma hazırda banklarda bu il üçün açılan vəsait sona çatmaq üzrədir, bəlkə də artıq bitib. İpoteka açılan zaman qiymətlər qalxır, sonra stabilləşmə baş verir. Vurğulamaq yerinə düşər ki, keçən illə müqayisədə 20 faizə qədər artım mövcuddur”.
Ekspertin sözlərinə görə, məsələn eyni binada 100 kvadratmetrlik mənzilin 1 kvadratmetri 2500 manata təklif olunursa:
“Ancaq 200-300 kvadratmetrlik mənzildə isə həmin dəyər 200-2200 AZN aralığında müəyyənləşdirilir.
Fərdi yaşayış, bağ evlərinin qiymətlərinə nəzər salsaq, hər il yay aylarında bahalaşma müşahidə edilirdi. Axırıncı, güclü, intensiv yağışların yağması, bəzi kanalizasiya xətləri olmayan ərazilərdə evlərə su dolması halları onların qiymətlərini stabil saxlayıb, hətta bəzilərində endirimlər edilir. Qış ayları ilə müqayisə edəndə qiymət artımı həyata keçirilməyib, icra olunsa da cüzi və o da torpaq sahələrinin dəyərinin yüksəlməsi ilə bağlıdır.
Elə torpaq bazarında da bahalaşmalar olur, boş torpaq sahələrində keçən illə müqayisədə 14-15 faizə yaxın qiymət artımı görürük. Bir çox ərazilər var ki, əsasən şəhər mərkəzləri orada daha çox bahalaşma mövcuddur.
Kirayə bazarında isə mövsümi olaraq qiymət artımı hələ yoxdur. Əsasən sentyabr ayında tələblərin gəlişi ilə və s. bahalaşma ilə qarşılaşırıq. Yaz-yay fəsillərində isə dəyişiklik olmur”.
Zərintac Mayisqızı
