Aprelin 20-də 286 nömrəli tam orta ümumtəhsil məktəbinin IX sinif şagirdi (müvafiq səbəbdən şagirdin adı qeyd olunmur) sinif yoldaşına xəsarət yetirib.
Bu xəbər ölkədə geniş müzakirə, sensasiya yaradıb. Valideynlərin çoxunda artıq həyəcan, narahatlıq yaranıb. Uşaqların, yeniyetmələrin necə düzgün tərbiyə edilməsi istiqamətində çox düşünülür. Aidiyyatı qurumlar, psixoloqlar, sosioloqlar və s. ziyalılar bu istiqamətdə açıqlamalar verməkdə davam edirlər.
Həmin hadisənin təfərrüatlarına gəlincə Bakı Şəhəri üzrə Təhsil İdarəsindən Zefer.media-ya açıqlamasında bildirilib ki, məktəb rəhbərliyi tərəfindən dərhal təcili-tibbi yardım çağırılıb:
“Şagirdə ilkin tibbi yardım göstərilib, müayinə və müalicə üçün səhiyyə müəssisəsinə aparılıb.
Məsələ ilə əlaqədar şagirdin valideynlərinə və aidiyyəti qurumlara məlumat verilib. Məsələ aidiyyəti qurumlar tərəfindən nəzarətə götürülüb və müvafiq araşdırmalara başlanılıb.
Həmçinin məktəbdaxili araşdırma çərçivəsində şagirdin sinif yoldaşları və müəllimlərlə söhbət aparılır. Məktəb psixoloqu tərəfindən şagirdlərlə zəruri dəstəkləyici tədbirlər həyata keçirilir.
İctimaiyyətdən araşdırma aparıldığını nəzərə alaraq, məsələyə daha həssas yanaşılması, hadisə barədə rəsmi qurumların açıqlamalarına istinad edilməsi xahiş olunur”.
Məsələ ilə əlaqədar həmin məktəbdən isə qeyd olunub ki, hadisəni araşdırmaq üçün Bakı Şəhəri üzrə Təhsil İdarəsinin nümayəndələri də məktəbdə olub, məsələ nəzarətə götürülüb:
“Hazırda səhiyyə müəssisəsində şagirdin müayinə və müalicəsi davam etdirilir. Şagirdin müalicə olunduğu səhiyyə müəssisəsində biz də olmuşuq, həkimlər müalicənin davam etdiyini bildirirlər.
Hazırda Elm və Təhsil Nazirliyinin Uşaq Müdafiəsi İdarəsinin nümayəndələri də məktəbdədir, müvafiq tədbirlərin həyata keçirilməsinə başlanılıb.
Məktəbdə şagird davranış qaydalarına əməl olunmasına diqqət artırılıb, təlim-tərbiyə prosesinə uyğun olmayan hallara qarşı maarifləndirmə işi genişləndirilib.
Hadisədən dərin təəssüf hissi keçirir, ailənin narahatlığını bölüşür, xəsarət alan şagirdimizin tezliklə sağalmasını arzulayır və ailəsinə dəstəyimizi bildiririk”.
Zərintac Mayisqızı
