Larri Devid Alan Derşovitslə dostluğunun pozulması barədə danışıb.
Zefer.media xarici mənbələrə istinadən bildirir ki, o, Derşovits Donald Trampın vəkili olduqdan sonra “şeytanla sövdələşmə” etdiyini bildirib.
Harvard Universitetinin keçmiş hüquq professoru olan Derşovits karyerasının müxtəlif dövrlərində Trampın, Cefri Epşteynin, O. C. Simpsonun və Harvi Vaynşteynin hüquq komandalarında yer alıb. O, həmçinin 2020-ci ildə Trampın ilk impiçment prosesi zamanı prezidentin müdafiə komandasının üzvü olub.
2021-ci ildə Devid və Derşovitsin uzun illər Massaçusets ştatının Martha’s Vineyard adasında dost və qonşu olduqları, lakin aralarında ictimai mübahisə baş verdiyi barədə məlumatlar yayılıb. Həmin vaxt “Curb Your Enthusiasm” və “Seinfeld” seriallarının yaradıcısı olan Devidin Derşovitsi “iyrənc” adlandırdığı eşidilib.
Derşovits daha sonra bu məlumatın doğru olduğunu təsdiqləyib. O, 2022-ci ildə The New Yorker jurnalına deyib:
“Birdən-birə Larri Devid ərzaq almaq üçün içəri girdi. Mən dedim: ‘Salam, Larri’. O isə üzünü çevirib getdi. Dedim: “Larri, heç olmasa danışa bilmərik?” O dedi: “Xeyr. Sən iyrəncsən”.
Lalə Qurbanlı
