ABŞ və İsrailin 28 fevralda İrana başlatdığı hücumlardan sonra Hörmüz Boğazının faktiki olaraq bağlanması səbəbilə enerji ehtiyacını böyük ölçüdə bu kritik keçid nöqtəsindən qarşılayan Asiya ölkələri enerji böhranı ilə mübarizə məqsədilə fövqəladə tədbirlər görür.
Zefer.media “TRT Xəbər”- ə istinadən bildirir ki, ABŞ və İsrailin İrana 28 fevralda başlatdığı hücumlardan əvvəl dünyada dəniz yolu ilə gündəlik neft istehlakı və mayeləşdirilmiş təbii qaz (LNG) ticarətinin təxminən 20 faizi Hörmüz Boğazından keçirdi.
Buradan həyata keçirilən daşımaların böyük hissəsi əsasən Çin, Hindistan, Yaponiya və Cənubi Koreya başda olmaqla Asiya ölkələrinə yönəlirdi.
Hörmüz boğazında gəmi hərəkəti ABŞ və İsrailin İrana qarşı başlatdığı hücumlar və Tehranın cavab tədbirlərindən sonra demək olar ki, dayanıb.
Bu boğazdan dəniz ticarətinin pozulması enerji tədarükü ilə bağlı narahatlıqları artırıb və qiymətlərin kəskin yüksəlməsinə səbəb olub.
Filippin yanacaq ehtiyatlarının 45 gün kifayət edəcəyini açıqlayaraq, İrana hücumlardan sonra “milli enerji fövqəladə vəziyyəti” elan edən ilk ölkə olub.
Tayvan İqtisadiyyat Nazirliyi isə təxminən 11 günlük LNG “təhlükəsizlik ehtiyatına” malik olduqlarını bildirib.
Banqladeş Neft Şirkətinin son hesabatında ölkənin yanacaq ehtiyatlarının təxminən 9-14 gün kifayət edəcəyi qeyd olunub.
Bir çox Asiya ölkəsində hökumətlər Yaxın Şərqdə gərginlik artdıqca enerji tədarükü ilə bağlı risklərə qarşı alternativ yanacaq növlərinin istifadəsi, məsafədən iş, iş günlərinin azaldılması və təhsilə fasilə verilməsi kimi tədbirlər tətbiq etməyə başlayıb.
Lalə Qurbanlı
