Gündəlik həyatımızda fərqinə varmadan etdiyimiz bəzi vərdişlər diş sağlamlığını poza bilər. Həmin öyrəşdiyimiz amillərin nələrə səbəb olduğu və dişlərə necə təsir göstərdiyi isə tez-tez müzakirə olunan mövzulardandır.
Mövzu ilə bağlı stomatoloq Vüqar Ələkbərov Zefer.media-ya açıqlamasında bildirib ki, gündəlik vərdişlər və qidalanma diş sağlamlığına birbaşa təsir göstərir:
“Dişlərin bərk toxumalarına zərər verən bir neçə əsas amil var ki, bunlardan birincisi mexaniki təzyiqlərdir. Məsələn, şüşə konfetləri dişləmək, tum çırtlamaq, dırnaq yemək və ya sap qopartmaq diş minasında ciddi çatlara yol açır. Kimyəvi tərəfdən isə sitrus meyvələrinin şirələri, alkoqollu içkilər və dişə yapışıb qalan iris tipli konfetlər kariesin yaranmasını sürətləndirən əsas səbəblərdir.
Bununla yanaşı, tütün məmulatlarından istifadə həm diş çürüməsinə, həm də ağız içi xərçəng riskinə zəmin yaradır. Çoxumuzun düzgün bildiyi bəzi vərdişlər də əslində ziyanlıdır. İntensiv şəkildə və xüsusən bərk tüklü fırçalarla diş yumaq həm diş ətini, həm də minanı zədələyir. Son olaraq, bruksizm, yəni dişləri bir-birinə qıcamaq da dişin bərk toxumalarını zamanla yeyib sıradan çıxarır”.
Lalə Qurbanlı
