Qarabağda bərpa mərhələsindən iqtisadi inkişafın yeni mərhələsinə keçid başlayıb. Bölgədə yaradılan yeni sənaye və logistika zonaları investisiyaların cəlb olunmasına imkan yaradır.
Zefer.media “Euronews”a istinadən xəbər verir ki, Qarabağda genişmiqyaslı bərpa-quruculuq işləri davam edir. Diqqət artıq yalnız yaşayış məntəqələrinin tikintisinə deyil, yeni iqtisadi imkanların yaradılmasına yönəlib.
Məlumata görə, Ağdam və Cəbrayıl rayonlarında yeni iqtisadi zonalar istehsal, sənaye və logistika istiqamətləri üzrə formalaşdırılır. Bu zonaların inkişafını stimullaşdırmaq və biznesin bölgəyə cəlb edilməsini sürətləndirmək məqsədilə vergi güzəştləri tətbiq olunur.
Şuşa rayonunda Azərbaycan Prezidentinin xüsusi nümayəndəsi bildirib ki, əsas məqsəd regionda uzunmüddətli və dayanıqlı inkişaf modelinin formalaşdırılmasıdır.
Şuşa şəhərinin bərpasında iştirak edən Dövlət Tarix-Memarlıq Qoruğunun baş memarı isə qarşıda duran vəzifəni “demək olar ki, sıfırdan başlamaq” kimi xarakterizə edib.
“Euronews”un materialında qeyd olunur ki, Qarabağın bərpası zamanı bərpa olunan enerjidən istifadə, rəqəmsal planlaşdırma, dron çəkilişləri və müasir xəritələndirmə metodlarından da yararlanılır.
Bölgədə aparılan işlərin Qarabağın gələcəkdə müasir, dayanıqlı və iqtisadi baxımdan inkişaf etmiş regiona çevrilməsinə hesablandığı bildirilir.
Aytən Yalçınqızı
