Estoniya Rusiya ilə sərhəddə hərbi mövcudluğunu gücləndirir və Narva şəhərində yeni baza inşa edir.
Zefer.media “Financial Times”a istinadən xəbər verir ki, sərhədyanı Narvada 200 hərbçi üçün nəzərdə tutulan yeni hərbi baza tikilir. Böhran zamanı obyektin daha 800 hərbçini qəbul edə biləcəyi bildirilir.
Həmçinin Tallinin Rusiyanın dərinliklərinə, o cümlədən Sankt-Peterburqa zərbə endirə biləcək silahlar aldığı qeyd olunur. Böyük Britaniyanın Estoniyaya Ukraynada istifadə edilən “Nyan” kamikadze PUA-larını verə biləcəyi bildirilir.
Estoniyanın hərbi və kəşfiyyat rəhbərliyi yaxın iki ildə Rusiya ilə NATO arasında genişmiqyaslı müharibə gözləmir. Bununla belə, Rusiyanın Estoniyaya qarşı məhdudmiqyaslı hücuma əl ata biləcəyi ehtimal edilir.
“Financial Times”ın məlumatına görə, belə bir təxribat Ukraynada atəşkəs və ya müharibənin dondurulmasından sonra baş verə bilər. Tallin artıq “aktiv müdafiə” strategiyasına keçir.
Estoniya kəşfiyyatı əhalisinin əksəriyyəti rusdilli olan Narvaya hücum ehtimalından narahatdır. Tallində hesab edirlər ki, şəhərin ələ keçirilməsi NATO üçün sınaq və alyans daxilində parçalanma cəhdi ola bilər.
Qəmər Kazımzadə
