Ermənistanın Belarusdakı müvəqqəti işlər vəkili Artur Sərkisyanı bu gün Belarus Xarici İşlər Nazirliyinə çağırılıb. Bu barədə Belarus XİN məlumat yayıb.
“Ermənistan tərəfinin son qeyri-dost hərəkətləri ilə əlaqədar olaraq erməni diplomata sərt etiraz bildirilib və müvafiq nota təqdim edilib”, – deyə məlumatda bildirilib.
Qeyd edək ki, Ermənistan parlamentinin sədri Alen Simonyan Belarusu Rusiyanın əyaləti adlandırmış və Ermənistanın bu cür əyalət kimi idarə olunmayacağını bəyan etmişdi. Belarus hakimiyyəti buna öz etirazını bildirib.
Xatırladaq ki, Belarus və Ermənistan Aİİ və KTMT-də təmsil olunsalar da, münasibətlərində gərginlik yaşanır. Hətta Ermənistan öz səfirini geri çağırıb və diplomatik nümayəndəlik müvəqqəti işlər vəkili səviyyəsindədir.
Milli Məclisin deputatı, politoloq Elşad Mirbəşiroğlu Zefer.media-ya açıqlamasında bildirib ki, Ermənistanla Belarus arasında diplomatik gərginlik yenidən gündəmə gəlib:
“Gərginliyin əsas səbəbi Ermənistan parlamentinin spikeri Alen Simonyanın Belarusu “Rusiyanın quberniyası” kimi xarakterizə etməsi olub. O, bu fikirləri Rusiya–Ermənistan münasibətlərinə dair mövqeyini açıqlayarkən səsləndirib və deyib ki, Ermənistan Belarus kimi idarə olunan dövlət ola bilməz.
Həmin açıqlama rəsmi Minskin sərt reaksiyasına səbəb olub. Belarus Xarici İşlər Nazirliyi Ermənistanın ölkədəki müvəqqəti işlər vəkilini nazirliyə çağıraraq ona nota təqdim edib. Nazirliyin sözçüsü Voronkov Ermənistan tərəfinin bu addımını “qəbuledilməz” adlandırıb və qeyd edib ki, İrəvanın Qərb yönümlü siyasəti əslində onu daha mürəkkəb vəziyyətə salır.
Əslində, Ermənistan–Belarus münasibətlərindəki gərginlik yeni deyil. Nikol Paşinyanın 2018-ci ildə hakimiyyətə gəlməsindən sonra iki ölkə arasında zaman-zaman fikir ayrılıqları müşahidə olunub. Xüsusilə, Kollektiv Təhlükəsizlik Müqaviləsi Təşkilatı çərçivəsində keçirilən görüşlərdə Belarus prezidenti Aleksandr Lukaşenko Ermənistan rəhbərliyinə qarşı açıq və sərt mövqe sərgiləyib.
Ermənistanı narahat edən əsas məqamlardan biri də Belarusun daim Azərbaycanın ərazi bütövlüyünü dəstəkləməsi olub. Həm keçmiş münaqişə dövründə, həm də Azərbaycanın işğaldan azad etdiyi ərazilərdə bərpa-quruculuq işlərinə dəstək verməyə hazır olduğunu bəyan etməsi İrəvanda unudulmayıb və bu amil münasibətlərə təsir göstərməkdə davam edir.
Digər mühüm faktor Belarusun Rusiya ilə sıx müttəfiqlik münasibətləridir. İki ölkə arasında “ittifaq dövləti” çərçivəsində inteqrasiya yüksək səviyyədədir. Belarus həmçinin KTMT-nin aktiv tərəfdarıdır və Ermənistanın bu təşkilatda fəaliyyətini faktiki dondurması Minsk tərəfindən narazılıqla qarşılanır”.
Politoloq əlavə edib ki, bununla yanaşı, hər iki ölkə Avrasiya İqtisadi İttifaqının üzvüdür:
“Ermənistan üçün bu təşkilat mühüm iqtisadi üstünlüklər yaradır. Məsələn, Rusiya qazının Ermənistana nisbətən aşağı qiymətlə satılması və digər ticarət imtiyazları ölkə iqtisadiyyatına müsbət təsir göstərir. Bu baxımdan, İrəvanın Qərb yönümlü siyasəti ilə Avrasiya məkanında mövcud öhdəlikləri arasında balans qurması getdikcə daha çətinləşir.
Müşahidələr göstərir ki, Ermənistanın Qərbə inteqrasiya cəhdləri ilə Rusiya və onun müttəfiqləri ilə münasibətləri arasında ziddiyyət dərinləşir. Bu isə Belarusla münasibətlərdə də özünü açıq şəkildə büruzə verir. Rəsmi Minsk artıq açıq şəkildə bəyan edir ki, erməni xalqı ilə Ermənistanın mövcud siyasi hakimiyyəti arasında fərq qoyur. Bu isə faktiki olaraq Belarusun Ermənistanın indiki rəhbərliyi ilə problemlərinin olduğunu göstərir.
Nəticə etibarilə, Ermənistanla Belarus arasında gərginliyin yaxın perspektivdə azalacağı gözlənilmir. Əksinə, Ermənistanda siyasi proseslər, xüsusilə seçkilər yaxınlaşdıqca, ölkə üzərində geosiyasi rəqabətin daha da intensivləşəcəyi və bunun ikitərəfli münasibətlərə əlavə təsir göstərəcəyi ehtimal olunur”.
Aytən Yalçınqızı
