Ermənistanın paytaxtı İrəvanda məhkəmə sabiq prezident Robert Köçəryanın oğlu Sedrak Köçəryan barəsində iki aylıq həbs qətimkan tədbiri seçib.
Zefer.media Rusiya KİV-lərinə istinadən xəbər verir ki, Sedrak Köçəryan atası Robert Köçəryanla birlikdə rüşvət alma və vəzifə səlahiyyətlərindən sui-istifadə ilə bağlı cinayət işi çərçivəsində saxlanılıb. Onun həbs edildiyini vəkil Aleksandr Koçubayev açıqlayıb.
Vəkil prosesi qanunsuz siyasi təqib kimi qiymətləndirib. Onun sözlərinə görə, bəzi epizodlar üzrə cinayət məsuliyyətinə cəlbetmə müddəti başa çatıb, digər ittihamların isə əsassız olduğu iddia edilir.
Ermənistanın Korrupsiyaya Qarşı Mübarizə Komitəsi Robert Köçəryan və oğlunun İrəvanda saxlanıldığını açıqlayıb.
Baş Prokurorluğun məlumatına görə, sabiq prezidentə qarşı vəzifə səlahiyyətlərindən sui-istifadə, rüşvət alma və çirkli pulların yuyulması maddələri ilə cinayət işi açılıb.
İş üzrə digər şəxslər arasında sabiq prezident Serj Sarkisyan, İrəvanın keçmiş meri Qagik Beglaryan və 2007-ci ildə vəfat etmiş keçmiş Baş nazir Andranik Marqaryan da var. Daha altı nəfərin də iş üzrə digər fiqurantlar olduğu bildirilir.
İstintaqın Robert Köçəryanın 2004–2009-cu illərdə prezidentliyi dövrünü əhatə etdiyi açıqlanıb.
Aytən Yalçınqızı
