Günümüzdə ənənəvi ticarətlə yanaşı onlayn alış-veriş də artıq geniş istifadə olunur. İnsanlar daha münasib qiymətə müxtəlif ölkələrdən istədikləri məhsulu əldə edə bilirlər. Bəs nə vaxtsa ənənəvi alış-veriş sıradan çıxa bilər mi?
Marketoloq Marat Namazov Zefer.media-ya açıqlamasında deyib ki, onlayn ticarət demək olar bütün dünyada insanların həyatının bir hissəsidir:
“Lakin bu ənənəvi ticarəti hər sahədə əvəz edə bilməyəcək. Amma təbii ki, internet üzərindən alış-verişin xeyli üstünlükləri çox, ənənəvi ticarətinki isə az. Ancaq oflayn ticarətdə toxunma hissi, emosiya var. Ona görə də insanlar heç vaxt oflayn alış-verişdən tam imtina etməyəcəklər”.
Marat Namazov qeyd edib ki, onlayn ticarətin üstünlükləri saymaqla bitmir:
“Hansı ki, xərclər minimumdur, çeşidlilik kifayət qədərdir. Məkan, region söhbəti yoxdur, hər kəs istədiyi yerdən, saat fərqli olmadan alış-veriş həyata keçirə bilirlər. Marketinq tərəfdən internet vasitəsilə ticarət daha çox ölçülə biləndir, daha detaylı məhsulları izləmək olur. Yaş qrupuna gəldikdə, belə alış-verişdən əsasən gənclər yararlanır. Ən çox alınan ləvazimatlara isə kosmetika, bijüteriya, elektronika daxildir. Ərzaq məhsulları, tikinti materialları, avtomobillər, dərman preparatları – çox bahalı olanların ənənəvi biznesdə satışı daha yüksəkdir. Ən uğurlu model sənin həm ənənəvi, həm də onlayn biznesinin olmasıdır. Belə ki, hər hansı bir müştəri sənin saytına daxil olur, məhsulu seçir və gəlir mağazandan alır. Nəticədə daha operativlik təmin edilir”.
Zərintac Mayisqızı
