Azərbaycan Prezidenti İlham Əliyevin Almaniyaya rəsmi səfəri dünya gündəminin əsas müzakirə mövzularından birinə çevrildi. Almaniya kansleri Fridrix Mertslə Prezident İlham Əliyev arasında rəsmi görüş təkcə növbəti diplomatik təmas deyi, Azərbaycan ilə Almaniya arasında son illər yüksələn siyasi dialoqun, qarşılıqlı etimadın və strateji tərəfdaşlığın növbəti mühüm mərhələsi kimi dəyərləndirilməlidir.
Ümumiyyətlə, Azərbaycan Respublikasının xarici siyasət strategiyasının mühüm istiqamətlərindən birini Avropanın lokomotiv aktorları kimi çıxış edən dövlətlərlə əməkdaşlıq təşkil edir. Bu kontekstdə Azərbaycan-Almaniya münasibətləri strateji əhəmiyyət kəsb edir.
Azərbaycanla Almaniya arasında dərin tərəfdaşlıq münasibətləri mövcuddur və Prezident İlham Əliyevin Almaniyaya rəsmi səfəri Bakı-Berlin münasibətlərinin inkişafında yeni mərhələnin başlanğıcı kimi qiymətləndirilir. Azərbaycan ilə Almaniya arasında iqtisadi sahədə əməkdaşlıq son illərdə güclənmiş və müxtəlif sahələri əhatə etmişdir. Bu əməkdaşlıq hər iki ölkənin iqtisadi maraqlarına uyğun olaraq müxtəlif sektorlar üzrə genişlənir.
Azərbaycan və Almaniya arasında ticarət əlaqələri inkişaf edir. Almaniya Azərbaycanın ən iri ticarət tərəfdaşlarından biridir. Əsasən, Azərbaycanın xammal ixracı və Almaniyanın texnologiya, maşınqayırma və avadanlıq ixracı ilə əlaqəlidir.
Alman şirkətləri Azərbaycanın enerji və infrastruktur layihələrində iştirak edir. Ümumilikdə, Azərbaycanın Almaniya ilə iqtisadi əməkdaşlığı, hər iki ölkənin strateji maraqları və iqtisadi inkişaf məqsədləri ilə uyğun gəlir və bu əlaqələr daha da dərinləşməkdədir. Bununla bərabər, enerji təhlükəsizliyi, Orta Dəhlizin inkişafı, yaşıl enerji, rəqəmsal iqtisadiyyat və sənaye kooperasiyası Bakı–Berlin əməkdaşlığına yeni strateji məzmun qazandırır.
Prezident İlham Əliyevin Almaniyaya rəsmi səfəri də məhz bu istiqamətlər üzrə əməkdaşlığın daha da genişlənməsinə, yeni razılaşmaların əldə olunmasına və Azərbaycan–Almaniya münasibətlərinin keyfiyyətcə yeni mərhələyə yüksəlməsinə mühüm töhfə verəcək. Həmçinin geniş Avropa kontekstində Almaniya ilə Azərbaycan arasındakı iqtisadi münasibətlər xüsusi əhəmiyyət kəsb edir.
Avropa İttifaqının ən böyük iqtisadiyyatı və sənaye lokomotivi olan Almaniya üçün enerji mənbələrinin şaxələndirilməsi, təchizat zəncirlərinin dayanıqlığı və Mərkəzi Asiya bazarlarına çıxış strateji prioritetlər sırasındadır. Bu baxımdan Azərbaycan Berlin üçün yalnız enerji tərəfdaşı deyil, həm də Avropa ilə Asiya arasında formalaşan yeni geoiqtisadi bağlantıların əsas halqalarından biridir.
Avropanın Cənubi Qafqaza marağının artdığı hazırkı geosiyasi şəraitdə Azərbaycan regionun sabitlik, enerji təhlükəsizliyi və nəqliyyat əlaqələrinin əsas təminatçılarından biri kimi çıxış edir. Məhz buna görə də Almaniya Azərbaycanı Cənubi Qafqazda etibarlı və strateji tərəfdaş kimi qiymətləndirir.
Prezident İlham Əliyevin praqmatik və balanslaşdırılmış xarici siyasəti nəticəsində Azərbaycan beynəlxalq münasibətlər sistemində nüfuzunu əhəmiyyətli dərəcədə artırmış, Avropa ilə əməkdaşlığını qarşılıqlı hörmət və milli maraqlar əsasında inkişaf etdirib.
Mövcud qlobal geosiyasi dəyişikliklər yeni əməkdaşlıq formatlarının yaranmasını zəruri edir və səfər çərçivəsində imzalanan Azərbaycan və Almaniya arasında strateji tərəfdaşlıq üzrə birgə bəyannamə bu baxımdan mühüm əhəmiyyət kəsb edir.
Enerji təhlükəsizliyi, Orta Dəhlizin inkişafı, yaşıl enerji, rəqəmsal iqtisadiyyat və sənaye kooperasiyası Bakı–Berlin əməkdaşlığına yeni strateji məzmun qazandırır. Prezident İlham Əliyevin Almaniyaya rəsmi səfəri də məhz bu istiqamətlər üzrə əməkdaşlığın daha da genişlənməsinə, yeni razılaşmaların əldə olunmasına və Azərbaycan–Almaniya münasibətlərinin keyfiyyətcə yeni mərhələyə yüksəlməsinə mühüm töhfə vermiş olacaq.
