Macarıstanın Baş naziri Viktor Orban ölkənin daxili siyasi mühitini sarsıdan kəskin bəyanatla çıxış edib. Baş nazir Ukrayna kəşfiyyatının müxalifətdəki “Tisza” partiyasının sıralarına sızdığını iddia edərək, rəsmi Kiyevdən həmin şəxsləri dərhal geri çəkməyi tələb edib.
Zefer.media xarici mətbuata istinadən xəbər verir ki, martın 26-da yayımlanan video müraciətində Orban Ukrayna Prezidenti Volodimir Zelenskiyə birbaşa müraciət edərək, onu “agentlərinə təcili olaraq geri qayıtmağı əmr etməyə və Macarıstan xalqının iradəsinə hörmət etməyə” çağırıb. Baş nazirin sözlərinə görə, Ukrayna tərəfi seçkilər ərəfəsində Macarıstanın siyasi dairələrindəki kəşfiyyat şəbəkəsini aktivləşdirib.
Orbanın ittihamları təkcə siyasi sızma ilə məhdudlaşmır; o, həmçinin “Tisza” partiyası ilə əlaqəli olan və Ukrayna tərəfindən maliyyələşdirildiyi iddia edilən İT mütəxəssislərindən də bəhs edib. O, bu seçkilərin xarici müdaxilə səviyyəsi baxımından “müstəsna” olduğunu vurğulayaraq, Macarıstan hakimiyyətinin vətəndaşların manipulyasiya olmadan səs verməsini təmin etmək üçün xarici təsirlərə qarşı qətiyyətli mübarizə apardığını bildirib.
Qeyd edək ki, bundan əvvəl Milli Təhlükəsizlik Komitəsi “Tisza” ilə əməkdaşlıq edən iki İT mütəxəssisinin Ukrayna ilə əlaqələrinin olduğunu və onların Budapeştdəki Ukrayna səfirliyinə mütəmadi baş çəkdikləri barədə məlumat yaymışdı. Bu hadisə Macarıstan və Ukrayna arasındakı onsuz da gərgin olan diplomatik münasibətləri daha da kəskinləşdirib.
Aytən Yalçınqızı
