Bu gün ömrünü Vətənin müdafiəsinə, dövlətçilik ideallarının təbliğinə və ictimai fəaliyyətə həsr etmiş dəyərli ziyalımız, Mətbuat Şurası İdarə Heyətinin üzvü, Xüsusi Təyinatlıların Qaziləri, Şəhid Ailələri və Veteranları İctimai Birliyinin sədri Bəhruz Məmmədzadənin doğum günüdür.
1981-ci il iyunun 1-də Masallı rayonunun Sığıncaq kəndində doğulan Bəhruz Məmmədzadə hələ gənc yaşlarından həyatını hərbi xidmətə və ölkəmizin suverenliyinin qorunmasına bağlayıb. O, 2003-2021-ci illərdə Azərbaycan Respublikası Müdafiə Nazirliyinin ən elit bölmələrindən olan Xüsusi Təyinatlı Qüvvələrdə şərəfli və örnək bir xidmət yolu keçib.
44 günlük Vətən Müharibəsinin ilk günlərindən ön cəbhədə olan və Şuşayadək qəhrəmanlıq dastanı yazan Bəhruz Məmmədzadə, Şuşanın düşməndən azad edilməsi uğrunda gedən ağır döyüşlərdə yaralanıb. Döyüş tapşırıqlarını qüsursuz yerinə yetirdiyinə və göstərdiyi xüsusi şücaətlərə görə o, müxtəlif dərəcəli 16 hərbi medalla təltif edilib.
2021-ci ildən ehtiyatda olan Bəhruz Məmmədzadə hərbi xidməti başa vursa da, Vətənə xidmət missiyasını ictimai və media sahəsində böyük fədakarlıqla davam etdirir. Hazırda “Xüsusi təyinatlıların qaziləri, şəhid ailələri və veteranları” İctimai Birliyinin sədri kimi qazi və şəhid ailələrinin hər zaman yanında olan Bəhruz Məmmədzadə, həm də ölkənin media mühitində ciddi nüfuz sahibidir. Azərbaycan jurnalistlərinin VIII qurultayında Mətbuat Şurasının İdarə Heyətinin üzvü seçilməsi onun ictimaiyyət və media cameəsi tərəfindən qazanılmış böyük etimadının göstəricisidir.
Onun hər zaman vurğuladığı “Vətənə xidmət peşəsindən asılı olmayaraq hər bir vətəndaşın borcudur” fəlsəfəsi bu gün həm yeni nəsil, həm də peşəkar media nümayəndələri üçün əsl vətənpərvərlik örnəyidir.
Zefer.media kollektivi olaraq, fəaliyyəti ilə hər zaman cəmiyyətə dürüstlük və peşəkarlıq nümunəsi göstərən Bəhruz Məmmədzadəni 45 illik yubileyi münasibətilə ürəkdən təbrik edir, ona cansağlığı, uzun ömür və həm hərbi, həm də ictimai sahədə dövlətimizə, millətimizə xidmət etdiyi bu şərəfli yolda yeni-yeni uğurlar arzulayırıq!
