Avropa İttifaqı (Aİ) TikTok-u istifadəçilərə davamlı olaraq oxşar məzmunlar tövsiyə edən “Sizin üçün” lentində rəqəmsal qaydaları pozmaqda ittiham edib.
Zefer.media TRT Haber-ə istinadən bildirir ki, Avropa Komissiyası TikTok-un məzmun tövsiyə sisteminə dair apardığı araşdırmanın ilkin nəticələri ilə bağlı açıqlama yayıb.
Açıqlamada bildirilib ki, platformanın fərdiləşdirilmiş “Sizin üçün” video lentində istifadəçilər psixi sağlamlıq problemləri və bədən görünüşü ilə bağlı məsələlərə dair davamlı olaraq oxşar məzmunlarla qarşılaşa bilərlər.
Açıqlamada qeyd olunub ki, istifadəçilərin müəyyən növ məzmunlarla qarşılıqlı əlaqəsi artdıqca, alqoritm onlara daha çox oxşar videolar təklif edir. “Dovşan yuvası effekti” adlandırılan bu vəziyyət xüsusilə uşaqların və bəzi böyüklərin psixi sağlamlığına mənfi təsir göstərə bilər.
Bildirilib ki, TikTok-un tövsiyə alqoritminin istifadəçiləri bu cür məzmun dövrlərinə cəlb etməsi riskini kifayət qədər qiymətləndirmədiyi müəyyən edilib.
Açıqlamada vurğulanıb ki, belə məzmunlara davamlı məruz qalmaq kədər və narahatlıq hissini artıra bilər. TikTok-un isə bu risklərin qarşısını almaq üçün effektiv tədbirlər görmədiyi qeyd olunub.
Avropa Komissiyası hesab edir ki, araşdırmanın hazırkı mərhələsində TikTok “Sizin üçün” lentinin dizaynında dəyişikliklər etməlidir.
Açıqlamada TikTok-un ilkin nəticələrə qarşı yazılı müdafiə təqdim edə biləcəyi bildirilib. Qeyd olunub ki, pozuntu yekun qərarla təsdiqlənərsə, şirkət qlobal illik dövriyyəsinin 6 faizinə qədər məbləğdə cərimələnə bilər.
Lalə Qurbanlı
