Bakı Dövlət Universitetinin (BDU) İnformasiya və sənəd menecmenti fakültəsində Azərbaycan Respublikasında “Şəhərsalma və Memarlıq İli”nə həsr olunmuş elmi seminar keçirilib.
BDU-dan Zefer.media-ya bildirilib ki, seminarda Kitabxanaşünaslıq kafedrasının müdiri dosent Elçin Əhmədov “Şəhərsalma və memarlıq irsinin kitabxana-informasiya təminatı” mövzusunda məruzə edib. Elçin Əhmədov 2026-cı ilin “Şəhərsalma və Memarlıq İli” elan edilməsi haqqında Prezident İlham Əliyevin 22 dekabr 2025-ci il tarixli Sərəncamının əhəmiyyətini vurğulayıb, bu istiqamətdə elmi-tədqiqat işlərinin aparılmasının vacibliyini diqqətə çatdırıb. O, şəhərsalma və memarlıq irsinin qorunması, bərpası və ötürülməsi prosesində kitabxana-informasiya resurslarının rolundan bəhs edib. Həmçinin müasir qloballaşma və sürətli urbanizasiya dövründə sahənin informasiya təminatının əhəmiyyəti əsaslandırılıb, memarlıq irsimizin və tarixi-mədəni abidələrimizin informasiya resurslarında əks olunma xüsusiyyətləri şərh edilib.
Tədqiqatda mövzu ilə bağlı indiyə qədər formalaşmış informasiya resurslarının arxitekturası kompleks şəkildə təhlil olunub. Ölkə kitabxanalarının sənəd əsaslı və rəqəmsal resursları müqayisəli şəkildə öyrənilib, onların struktur xüsusiyyətləri, informativlik səviyyəsi və elmi dövriyyədə istifadəsi məsələləri araşdırılıb. Bildirilib ki, bu resursların sistemli təhlili sahə üzrə mövcud vəziyyətin daha dolğun öyrənilməsinə və effektiv informasiya təminatının formalaşdırılmasına imkan yaradır.
Məruzədə, həmçinin şəhərsalma və memarlıq irsinə dair informasiya resurslarının formalaşdırılması prosesində kitabxana-informasiya müəssisələrinin rolu, müasir metadata standartlarının tətbiqinin əhəmiyyəti, sahə üzrə resursların rəqəmsallaşdırılması kimi aktual məsələlər də diqqəyə çatdırılıb.
Elmi seminar müzakirələrlə davam edib.
