“Azərbaycan Avropa Şurasından tam şəkildə çıxsa, ölkəmizdə heç kəs bunu hiss etməyəcək. Yəni burada çox şey dəyişməyəcək, bəlkə də bundan daha yaxşı olacaq”. Bu sözləri Prezident İlham Əliyev IV Şuşa Qlobal Media Forumunun açılışında söyləyib.
“Biz toqquşmaya getmək istəmirik, xüsusən də nəinki Avropa Şurası Parlament Assambleyasına gəldikdə, o cümlədən Avropa Parlamentini götürsək. Yenə də deyirəm, onlar bizə qarşı belə əsassız addımlar atırlar. Onlar Azərbaycana bu qədər xüsusi bir qərəzlə yanaşırlar. Bu, onların hücumlarıdır və onların hamısı əsassızdır”, – deyə dövlətimizin başçısı vurğulayıb.
Prezidentin fikirlərini şərh edən Azərbaycan Mətbuat Şurasının İdarə Heyətinin üzvü, “Bakı Xəbər” qəzetinin baş redaktoru, siyasi şərhçi Aydın Quliyev Zefer.media-ya açıqlamasında bildirib ki , Azərbaycan Prezidentinin Avropa Şurası ilə bağlı belə bir bəyanat səsləndirməsi gözlənilən idi:
“Son illərdə Avropa Şurası və Avropa Parlamenti Azərbaycanın maraq və siyasətinə uyğun olmayan yanaşmalar nümayiş etdirir. Xüsusilə ikili standartlar əsasında qəbul edilən qərarlar Azərbaycanda Avropa institutlarına olan etimadı ciddi şəkildə sarsıdıb. Bir çox hallarda bu qurumların ölkəmizə münasibəti məhz ikili standart prinsiplərinə söykənir. Bu səbəbdən Azərbaycanın Avropa strukturları ilə getdikcə məsafə yaradan siyasəti mövcud şəraitin məntiqi nəticəsi kimi qiymətləndirilə bilər. Azərbaycan dəfələrlə Avropa qurumlarının qəbul etdiyi qərarların yanlış olduğunu və islahatlara ehtiyac duyulduğunu bəyan etsə də, qarşı tərəf münasibətləri daha da gərginləşdirən siyasət yürütməkdə davam edir. Hazırda Azərbaycanın Avropa Şurası Parlament Assambleyasındakı nümayəndə heyəti fəaliyyətini dayandırsa da, AŞPA-da ölkə ilə bağlı müzakirələr Azərbaycan nümayəndələrinin iştirakı olmadan davam etdirilir. Halbuki ilk növbədə nümayəndə heyətinin fəaliyyətinin bərpası üçün addımlar atılmalı idi. Əksinə, Azərbaycana qarşı sərt ritorika davam etdirilir”.
Həmçinin müsahibimiz Azərbaycanın təhlükəsizliyi, iqtisadiyyatı və gündəlik həyatının Avropa Şurasından asılı olmadığını da qeyd edib:
“Bu baxımdan Prezidentin bugünkü bəyanatını Avropa strukturlarına ünvanlanan ciddi siyasi mesaj və xəbərdarlıq kimi qiymətləndirmək olar. Bu açıqlama həm rəsmi Bakının, həm də Azərbaycan cəmiyyətinin Avropa qurumlarının yanaşmasından narazı olduğunu göstərir. Eyni zamanda Prezident Azərbaycanın gələcəkdə Avropa Şurasından çıxmaq kimi addımı real şəkildə nəzərdən keçirə biləcəyinə işarə edir. Ona görə də Avropa strukturları münasibətlərin daha da gərginləşməsinə səbəb olacaq addımlardan çəkinməli və vəziyyətin normallaşdırılması üçün səylər göstərməlidirlər. Reallıq ondan ibarətdir ki, Azərbaycanın təhlükəsizliyi, iqtisadiyyatı və gündəlik həyatı Avropa Şurasından asılı deyil. Bu səbəbdən də Azərbaycan Avropa strukturlarını tərk edərsə, ölkə daxilində bunun ciddi təsiri hiss olunmaya bilər. Əksinə, belə bir ssenari ilk növbədə Avropa qurumlarını narahat etməli və onları Azərbaycanla münasibətlərə yenidən baxmağa sövq etməlidir”.
Qəmər Kazımzadə
