Masallı rayonunun Viləş kəndində rayonun İcra Hakimiyyətinin təşkilatçılığı ilə Aprel döyüşləri şəhidi Əsgərli Nurlan Bayram oğlunun şəhadətinin 10-cu ildönümü ilə əlaqədar anım günü keçirilib.
Zefer.media xəbər verir ki, anım günündə Masallı Rayon İcra Hakimiyyətinin başçısı Araz Əhmədov, Milli Məclisin Deputatı Məşhur Məmmədov, hüquq-mühafizə orqanlarının rəhbərləri, YAP Masallı Rayon Təşkilatının sədri Seyfəddin Əliyev, digər rəsmi şəxslər və şəhid ailələri iştirak ediblər.
Tədbir iştirakçıları Nurlan Əsgərlinin anım günü tədbirindən sonra qəhrəman şəhidlərimiz Nurlan və İntiqam Əsgərlilərin ömür yolunu yaşadan, xatirələrini qoruyub saxlayan ev muzeyinin açılışına qatılıblar, xatirə kitabına ürək sözlərini yazıblar.
Deputat Məşhur Məmmədov bütün bunlarla əlaqədar paylaşım edib: “Mərasim iştirakçıları ilə birgə qəhrəman qardaşlar – şəhidlərimiz Nurlan və İntiqam Əsgərlilərin xatirəsini yaşadan ev muzeyini ziyarət edərək, onların şərəfli ömür yolunu bir daha ehtiramla yad etdik.
Şəhidlərimizin əziz xatirəsi daim qəlbimizdə yaşayacaq. Allah bütün şəhidlərimizə rəhmət eləsin, ailələrinə səbir versin”.
Tədbir və muzey açılışından sonra Məşhur Məmmədov vətəndaş qəbulu həyata keçirib və bildirib:
“Bu gün Yeni Azərbaycan Partiyasının Masallı rayonunda yerləşən inzibati binasında vətəndaş qəbulu keçirdik. Qeyd edim ki, yağmurlu Bakıdan fərqli olaraq, Masallıda əsl yaz havası var. Qəbul zamanı YAP Masallı rayon təşkilatının sədri Seyfəddin Əliyev və köməkçilərimlə birlikdə hər bir vətəndaşı fərdi şəkildə dinlədik.
Bəzi seçicilərin müraciətləri yerində həllini tapdı, digərlərinin müraciətləri isə aidiyyəti qurumlara yönləndirilməsi üçün qeydiyyata alındı.
Vətəndaş qəbulu hər zaman bizim üçün prioritetdir. Çalışırıq ki, bizə ünvanlanan bütün müraciətlər müsbət həllini tapsın.
Qəbullarımız davam edir”.
Zərintac Mayisqızı
