Zefer.media-nın müraciətinə “ADSEA” Mətbuat Xidməti dərhal reaksiya verib; qurumun operativ müdaxiləsi nəticəsində vətəndaşın problemi yerindəcə həllini tapıb.
Bir neçə gün öncə Zefer.media redaksiyasına Ağcabədi rayonunun Rəşbərilər kənd sakini Həsənov Bayram Səməd oğlu tərəfindən video müraciət daxil olub. Kənd sakini təsərrüfatını suvarmaq üçün su tapa bilmədiyini, nəticədə 1.70 hektar yonca sahəsinin məhv olmaq təhlükəsi ilə üz-üzə qaldığını bildirib. B.Həsənov kənddəki Qarabağ kanalının su paylayıcı bəndlərinin baxımsız olduğunu, 2019–2020-ci illərdə çəkilişinə başlanılan su boru xəttinin yarımçıq qaldığını qeyd edərək aidiyyəti qurumlara və ölkə rəhbərliyinə müraciət edib.
Məsələ ilə bağlı Zefer.media tərəfindən Azərbaycan Dövlət Su Ehtiyatları Agentliyinin (ADSEA) Mətbuat Xidmətinə müraciət ünvanlanıb.ADSEA Mətbuat Xidməti müraciəti yüksək həssaslıqla qarşılayaraq dərhal operativ şəkildə reaksiya verib və problemin həlli istiqamətində görülən tədbirlər barədə redaksiyamıza məlumat daxil olub.
Mətbuat xidmətinin operativ yönləndirməsi ilə rayon su təsərrüfatı nümayəndələri və Su İstehlakçıları Birliyinin (SİB) əməkdaşları dərhal əraziyə cəlb olunublar. Əraziyə keçirilən baxış zamanı sözügedən 1.70 hektar yonca sahəsinə suyun ötürülməsi üçün xüsusi arxlar çəkilib və sahənin suvarılması yerindəcə təmin edilib.
Görülən işlərdən sonra “Sudan İstifadəedənlər Birlikləri ilə kənd təsərrüfatı istehalçıları arasında suvarma suyunun verilməsi üzrə akt” hər iki tərəfin imzası ilə rəsmən təsdiqlənib.
Ərazidən çəkilən son görüntülərdə (19 avqust 2026-cı il, saat 14:35) B.Həsənov sahəsinə suyun artıq axdığını və suvarmanın aparıldığını bildirib. Çəkiliş zamanı verdiyi açıqlamada o, arxın çəkildiyini, suvarma işlərinin tam həyata keçirildiyini və hazırda heç bir narazılığının olmadığını vurğulayıb.
Zefer.media olaraq vətəndaşların problemlərini işıqlandırmaqla yanaşı, media sorğularına xüsusi həssaslıqla yanaşan, operativ reaksiyası və peşəkar fəaliyyəti ilə vətəndaşın su problemini qısa zamanda həll edən “ADSEA” Mətbuat Xidmətinə və aidiyyəti su təsərrüfatı qurumlarına təşəkkürümüzü bildiririk.
1. Vətəndaşın ilkin müraciəti (Videoşikayət)
2. Məsələnin həllindən sonrakı görüntülər
