İran ABŞ Silahlı Qüvvələrinin Mərkəzi Komandanlığının (CENTCOM) rəhbəri Bred Kuperin bəyanatına münasibət bildirərək, Amerikanın İrana qarşı hərbi əməliyyatlarına dəstək verdiyi iddia olunan ölkələrin ərazilərindəki ABŞ hərbi bazalarını hədəfə almaq hüququna malik olduğunu açıqlayıb.
Mövzu ilə bağlı Zefer.media-ya açıqlamasında siyasi şərhçi Tural İrfan bildirib ki, İran və ABŞ arasında davam edən gərginliyin diplomatik yollarla nizama salınmasına ümidlər azalır:
“Böyük ehtimalla həlledici mərhələ müharibə olacaq. Çünki tərəflər razılığa gələ bilmir. İran Körfəz ölkələrini vurur. Bu da İrana hərbi müdaxiləyə əsas yaratmaq üçün şərait yaradır. İranın hazırkı vəziyyəti vaxtilə İraqın vəziyyətinə bənzəyir. İlk olaraq İraqı Küveyti işğal etməyə təhrik etdilər, sonrakı illərdə nüvə məsələsini ortaya qoydular, terrora dəstək verməkdə ittiham etdilər, daha sonra isə işğal edib böldülər. Hazırda İrana qarşı da oxşar ssenarinin hazırlandığı görünür. ABŞ daxilində müəyyən tərəddüdlər də var. Ərəb ölkələrini İrana qarşı daha sərt mövqe tutmağa məcbur etmək üçün hələ ki, İranın hücumlarına zəmin yaradılır. İranın ərəb ölkələrini təhdid etməsi qarşılığında onların ciddi müqavimət göstərə bilməyəcəyi düşünülür. İranın ABŞ hərbi bazalarını hədəfə alması isə ABŞ və onun müttəfiqlərinin daha ciddi tədbirlər görməsinə səbəb olacaq. Əslində, İranın bu cür bəyanatları və hücumları ABŞ və müttəfiqlərinin hərbi müdaxiləsini qanuniləşdirən amillərdir. Eyni zamanda dünyada İrana qarşı hücumların tənqid olunması prosesinə qarşı sanki psixoloji müqavimət yaradılır. Artıq İrana edilən hücumlar deyil, İranın həyata keçirdiyi hücumlar müzakirə olunur. Görünür ki, ab-hava İranın ziyanına dəyişir”.
Müsahibin sözlərinə görə, Türkiyə və Pakistanın etirazı hələlik həlledici müharibənin qarşısını alsa da, hərbi qarşıdurma ehtimalı yüksək olaraq qalır:
“Türkiyə və Pakistanın ciddi etirazı səbəb olur ki, ABŞ və İsrail İrana qarşı həlledici müharibəyə başlamasın. Bununla belə, son anda bu ölkələrlə də razılığın əldə olunması mümkündür. Çünki Türkiyə əsasən İsraillə mövcud problemlərə görə, eyni zamanda Yaxın Şərqdə hadisələrin daha da dərinləşməsinin onun üçün ciddi problemlər yaradacağını düşündüyündən bu müdaxiləyə qarşı çıxır. Əks halda, İranın bütün bəşəriyyət üçün təhlükə olduğu fikri geniş şəkildə səsləndirilir. Ümumilikdə, ABŞ ilə İran arasında yaranmış vəziyyət müharibə ehtimalını artırır. Əsas gözlənti ondan ibarətdir ki, İran Körfəz ölkələrində yerləşən ABŞ bazalarına hücum edərkən həmin ölkələrin əhalisinə və mülki infrastrukturuna da zərbələr endirə bilər. Əgər bu, qəsdən və ya bilməyərəkdən baş verərsə, bu, ABŞ və onun müttəfiqlərinin İrana qarşı hətta quru qoşunları yeritməsinə belə səbəb ola bilər”.
Qəmər Kazımzadə
