“Ərazilərini və hərbi infrastrukturlarını İrana qarşı hücumlar üçün ABŞ-yə verən ölkələr ciddi fəsadlarla üzləşəcəklər”.
Bu barədə İranın Xarici İşlər Nazirliyinin rəsmi nümayəndəsi İsmayıl Bəqai bildirib.
“Avropadakı ərazilərini, bazalarını və infrastrukturlarını ABŞ və İsrailin hücumları üçün təmin edən tərəflər öz iştiraklarına və sonrakı nəticələrə görə məsuliyyətdən yayına bilməzlər”, – o qeyd edib.
İranın açıqlaması Yaxın Şərqdə hərbi-siyasi vəziyyətin daha da mürəkkəbləşə biləcəyinə dair ehtimalları artırır. Bu prosesi şərh edən politoloq Elçin Xalidbəyli Zefer.media-ya açıqlamasında bildirib ki, regionda yaranmış gərginlik getdikcə daha təhlükəli xarakter alır:
“Hazırda Yaxın Şərqdə baş verən hadisələr bütövlükdə qlobal məkanda olduqca ciddi gərginliyin əsas qaynağı rolunu oynayır. Yaxın Şərqdəki bu gərginlik, istər-istəməz, qlobal məkanla yanaşı, qonşu bölgələrə də ciddi şəkildə təsir edir. İranın ətrafında baş verənlər həm qonşu ölkələrdə, həm də qonşu regionlarda olduqca ciddi gərginlik mənbəyi rolunu oynayır. Ona görə də hesab etmək olar ki, Yaxın Şərq böhranı hazırda dünyanın ən təhlükəli problemlərindən biridir”.
Ekspert həmçinin qeyd edib ki, hadisələrin bundan sonrakı gedişatı regionun taleyinə birbaşa təsir göstərə bilər:
“Son vaxtlar bir atəşkəs sənədinə imza atmaq mümkün olsa da, belə anlaşılır ki, Amerika Birləşmiş Ştatları və İran arasındakı danışıqlar prosesi neqativ məzmun daşıyır və anlaşma ehtimalları artıq getdikcə azalır. Qarşılıqlı hərbi zərbələr də bunu təsdiqləyir.
Ona görə də hesab etmək olar ki, ABŞ və İran arasında qarşılıqlı hərbi zərbələr, eyni zamanda qarşılıqlı təhdidlər yaxın vaxtlarda həm qlobal məkanda, həm də Yaxın Şərq regionunda hadisələrin nəzarətdən çıxma təhlükəsini ön plana keçirə bilər.
Bu gərginlik, istənilən halda, yeni, genişmiqyaslı savaş ehtimalını da aktual olaraq saxlayır. Mövcud situasiyadan əsas çıxış yolları kimi danışıqlar masasına yenidən geri dönmək daha faydalı olardı. Bu, həm münaqişə tərəfləri üçün, həm də qlobal iqtisadiyyat və qlobal təhlükəsizlik baxımından böyük önəm daşıyır.
Əgər qarşıduran tərəflər bu gərginlikdən və savaş təhlükəsi yaradan addımlardan imtina etməsələr, yaxın gələcəkdə daha genişmiqyaslı savaş təhlükəsi yarana bilər və hətta Yaxın Şərq böhranının arealı daha da genişlənib qlobal məkan üçün təhlükə səviyyəsini artıra bilər”.
Lalə Qurbanlı
