Pakistanın vasitəçilik etdiyi ABŞ–İran danışıqları müharibəni bitirəcək sənədin imzalanması ilə yekunlaşmaq üzrədir.
Zefer.media xəbər verir ki, “Reuters” agentliyi “Axios” nəşrinin Tehran və Vaşinqtonun “bir səhifəlik anlaşma memorandumuna” yaxınlaşdığı barədə məlumatını təsdiqləyib.
Adı açıqlanmayan Pakistan rəsmisinə istinadən bildirib ki, sənədin razılaşdırılması son mərhələyə çatıb.
“Biz bu memorandumu çox tezliklə imzalayacağıq. Həmin mərhələyə yaxınlaşırıq”, – rəsmi vurğulayıb.
Memorandum müharibəyə son qoyulmasını və eyni zamanda 30 günlük danışıqlar mərhələsinin başlamasını nəzərdə tutur. Qeyd olunur ki, ABŞ İranın uranın zənginləşdirilməsini ən azı 12 il müddətinə tam dondurmasını tələb edir.
Danışıqların sonunda İranın heç vaxt nüvə silahı əldə etməyəcəyinə dair öhdəlik götürməsi və BMT-nin müdaxiləli yoxlamaları daxil olmaqla genişmiqyaslı yoxlamalara razılıq verməsi qarşılığında Tehrana uranı yalnız 3,67%-ə qədər zənginləşdirməyə icazə verilə bilər.
Zərintac Mayisqızı
